No.6541/2020-2021

Vawiin khan Information and Public Relations Minister Pu Lalruatkima chuan MZP Conference Hall-ah Pang Zirlai Exam hrang hranga tithate chawimawina hun leh freshers lawm luhna hun Pang Zirlai Pawl (PZP)Joint Headquarters:Aizawl buatsaih chu a hmanpui.

Information and Public Relations Minister  Pu Lalruatkima chuan hunserh hman saktu, Rev C. Ramsangvawra, PZP hruaitute leh member zawng zawngte, zirlai naupang duhawm tak tak leh nu leh pate leh hmuna  kal zawng zawngte chungah chibai a buk a. Minister chuan kan hriat theuh angin khawvelin harsatna kan tawk mek a, kan beisei leh kan duhdan ang pawhin thil a kal thei meuh lo a, sawrkarin theih tawp chhuahin zirlai result te pawh tih chhuah niin hetiang hun lawmawm leh hlu tak kan hmang thei hi a lawmawm takzet a ni, a ti a. Pang Zirlai Pawl hruaitute chungah he hun hmang ve tura sawm a nih avangin lawmthu a sawi bawk a ni. Minister chuan hetiang result tha hmu tlaka zirlaite inpekna hi fakawm a ti thu sawiin chawimawi pawh an phu hle a ni, a ti a. Chutihrualin zirlai thar te tuna an u te anga chawimawina an hmuh ngei theih nan lawm an nih thu a sawi a. Zirlai tha leh result tha nei tur chuan zirtirtu ten zirtirna an pek danin a zir a ngai a, chu zirna tha leh naupangte hmalam hun siam tura hma an lakna ah mi te entawn tlak an ni tih a sawi a. Kum engemaw zat kalta atang khan zirlaite result kan lo bih nasa zual a, zirlai engemaw zat result tha tak  Pang Zirlai ten an nei ziah mai hi a lawmawm takzet a, chubakah khawtlang leh chhungkua a inzirtirna a tha ani tih a hriat a ni tiin a sawi. A bik takin zirlai pass thar te – khawvel changkang tawh takah leh a thei thei dinchanna (survival of the fittest) kan tihna hmunah in rawn dak chhuak tan tak tak tawh dawn a, theihtawp chhuaha taimakna leh tum ruhna nei chungin in hmalam pana taimakna nen theihtawp chhuah zel turin Minister chuan duhsakna a hlan bawk a.

Minister chuan Marksheet a mark tha ringawt hi an hlawhtling vek lo a ni tih hriat a tha a, a tum ruh leh a taima apiang tan chauh he khawvelah hlawhtlinna a awm a ni, a ti a. Nih tum, tih tum-ah  chian a tha a,  BA leh MA zir ve tawp a degree nei, mahse hna hmuh nan emaw tangkai taka an zirchhuah degree te hmang ta lem lo, mizo ah hian kan tam hle a, hetiang ang hi nih tum loh tur a ni, tiin a sawi. Tun atanga kum 10 ah eng dinhmunah nge in din ang tih hi in ngaihtuahna ah lo awm se, zirlai pass thar te pawh hian enge ka zir leh anga, chhungten tha an tih avang ringawta zir ve mai kan ni em tih hi kan ngaihtuah a tha a, kan kalna tur tun atangin fumfe takin duang ila, chumi Goal hlen chhuak thei tur chuan theihtawp kan chhuah tur a ni, a ti a. Nu leh pa te pawn kan fate tuina, eng kawng nge zawh se kan tih tih hi an mizia leh nihphung atang hian uluk taka kan thlan pui a ngai hle a ni, a ti a. Zirlaite'n nu leh pate thuawih zir ula, aia upate zah thiam ula, in nu leh paten sum tam tak sengin hlawhtlinna in hmuh theihna atan theihtawp an chhuah a ni tih hre reng turin Minister hian a chah a ni. Minister chuan Central Sawrkarah hnaruak a tam em em a, in lo zir chhuak a nih pawhin kan State ringawt hi hnathawh nan tum lo ula, Sawrkar hna kher ni lo, private Company lian tak takah pawh sawrkar hnathawk aia hlawh tha an pekna pawh a awm teuh tih hria ula hnam leh ram tana theih tawp chhuah turin a beisei a ni.

Minister Pu Lalruatkima hian B.Th, BD, MA, MCA pass thar pakhat teuh bakah Class X Zirlai 7, Class XII Zirlai 10 te hnenah lawmpuina citation a hlan a ni.