Home Minister Pu R.Lalzirliana chuan vawiin chawhma dar 10:00 khan Vanapa Hall-ah Government Zirtiri Residential Science College Freshers’ Social cum Farewell a hmanpui.

Home Minister chuan zirlaite hmaah thu sawiin MZU Exam result tihchhuah ah University Topper te neia result tha tak an neih avangin lawmpuina a hlan a, college zirlaite chu puitling chin awmna a nih rualin nungchang hlohna a nih theih hre renga, hmathlir thui tak nena taima tak leh thahnemngai taka zir thin turin a chah a. Degree aiin rawih tlak thiamna a pawimawh zawk a ni tiin Minister chuan tunlai khawvel mamawh thiamna puakchhuah tum theuh turin a chah bawk. Hna indaihlohna a san zel avangin Mizoram pawnlama hna thawk thei tura inbuatsaih turin zirlai te chu a fuih bawk. Thuamhnaw leh incheina ringawt buaipui lo tura fuihin thiamna chu an incheina mawi ber a nih zawk thu a hrilh. Lehkhathiam tak, hawihhawmna nei lo, aia upa zahna leh tlawmngaihna hre lo chuan hnam nun a tichhia tiin Nu leh Pa te zaha chawimawi thiam tur leh Mizo hnam nun mawi tak chhawm nung zel turin a chah bawk. Tawng thiam loh chuan harsatna lian tak a thlen thin tiin Pu Lalzirliana chuan sap tawng hmang uar deuh deuh turin a fuih bawk. Mihring nun hlutna chu dam reina aiin ram leh hnam tan enge a thawh ve tih zawk a nih thu sawiin Minister chuan ram leh hnam tana mi tangkai nih tum theuh turin zirlai te chu a fuih bawk a ni.

Govt. Zirtiri Residential Science College Principal Pu J.H.Zoremthanga chuan an College-a luh dil an thathnem thu leh an lak vek theih loh thu te sawiin Durtlang-ah anmahni hmun tur buatsaih mek a nih thu te a sawi lang a. Kumin-a lut thar zirlai 249 te lawmna leh zir zo kal chhuak turte thlahna te neiin, ni 11 May, 2013 zinga Laipuitlang leimina boral ta Hmingthanpuia, B.Sc. II Year zirlai sunna hun an hmang bawk a ni.