MZP Sub- Headquarters bultumin vawiin chawhma  khan Kawlkulh Town Hall-ah HSLC leh HSSLC passed-te chawimawina hun hman a ni a, he hun hi School Education Minister Pu H.Rohluna chuan  khuallian niin a hmanpui.

Khuallian Pu H. Rohluna chuan zirnaah Elementary Level a pawimawhzia sawiin zirna hi a bulthut a fuh loh chuan a lerah a fuh thei tak tak lo va, hei vang hian sorkar pawhin Elementary lamah hma a la nasa a, zirtirtu indaihlohna pawh a ziaawm theih nan nasa takin sorkarin hma a la mek a ni, a ti.

Vawiina HSLC leh HSSLC Examination-a tithate chawimawina hun hman a ni leh ta lawmawm a tih thu sawiin chawimawina dawngtute chu a lawmpui takzet tih a sawi a ni. 

Pu Rohluna chuan kumin HSLC leh HSSLC result chhuakah hmasawnna chi hrang hrang hmuh tur a awm a, kum dang zawng aiin passed percentage a san bakah kum dangah chuan Third Division-a passed an tam ber thin laiin kuminah chuan Second Division-a passed an tam ber a, hei hian zirlaiten quality improvement nasa tak a awm tih a tarlang a, khawpui leh thingtlang lam zirlaite result pawh a inhrutrual chho tan hle a ni, a ti a. Minister chuan zirlaite chu  tum mumal neia lehkha zira chhui zui tlak leh hriatzui tlak ni tura chahin mi puitling an nih theih nan an zirtirtute pawh rawn hreh lo turin a fuih bawk a ni.