No.2848/2021-2022
Dated Aizawl, the 2nd November, 2021: Vawiin hian Serchhip District Disaster Management Authority te chu sawm bik mi pawimawh dangte nen district chhunga zirna in kalpui dan tur ngaihtuahin DC Meeting Hall ah an thukhawm.

Meeting kaihruaitu Pu Lalmuansanga Ralte, Addl. DC, Bawrhsap mawhphurhna la mektu chuan Covid19 leng meka Serchhip district dinhmun tlangpui leh State thuneitu lamin Board Exam hmabak mek Class 10 leh 12 te leh Training Institute te chu class kal a remtih sak tawh thu a tarlang hmasa a. Government Serchhip College pawh Practical Activity an ngah avanga CAB tha taka zawm chunga DDMA in Class kal a lo phal sak tawh thu a tarlang bawk a. Heng, class kal phalna nei tawh sa te bak zirlai hrang hrangte chu nitin school kal tir ve mai a tha em tih ngaihtuah ho zui nghal a ni.

Meeting hian Serchhip district a Residential Institute pali, Horticulture College Thenzawl, JNV Thenzawl, Eklavya Residential Model School Serchhip leh Sainik School Chhingchhip te chu CAB tha taka zawm chunga an zirna chhunzawm tir remtih sak an ni a. A bak zirna dangte erawh chu Covid19 hri awm lohna khua, an khawtlang hruaitu, VLTF leh School thuneituten inlungruala school kal chhunzawm tha an tiha, DDMA a dilna an rawn thlen chuan ngaihtuah sak ni se tha an ti tlang a, hei hi inkaihhruaina thar ber a rawn chhuah hmaa an kal dan pangai kha a ni.

He meeting ah hian DDMA member te bakah YMA aiawhte, MJA aiawhte, MUP aiawhte, Serchhip Joint VC leh Thenzawl Joint VC aiawh te, N. Vanlaiphai leh Thenzawl SDO te, District Surveillance Officer te, Social Welfare lam aiawhte, Education lam atangin Serchhip DEO, SDEO leh Thenzawl leh N. Vanlaiphai SDEO te an tel a ni.