Health and Family Welfare Minister, Pu Lal Thanzara chuan Mizoram Upa Pawl(M.U.P) Diamond Jubilee lawmna Vanapa Hall-ah a hmanpui.

M.U.P chu pawl tlawmngai, zahawm leh thianghlim anih thu leh Mizoramin hetiang pawl chhuanawm tak kan nei hi thlamuanthlak a tih thu khuallian Pu Lal Thanzara chuan sawiin kum upate tan National Programme for Healthcare of Elderly(NPHCE) hnuaia hmalakna hrang hrang a sawi a. Aizawl leh Lunglei Civil Hospital-ah Doctor 2,Nurse 6 leh Physiotherapist 1 ve ve lak annih tawh thu leh Lunglei Civil Hospital-ah kum lama upate tan OPD hranpa siamsak niin OPD card lakna-ah intlarna hranpa siamsak an ni a, Medicine ward-ah pawh khum 4 upate tan bika ruahman ani bawk.

Health Minister chuan Aizawl Civil Hospital-ah Elderly Ward sak mek niin peihfel anih hma chuan Cardiology Department chungah Elderly Ward khum 4 awm theihna lo siam lailawk tum anih thu a sawia, Aizawl Civil Hospital-ah hian upate tana hman tur Physiotherapy leh hmanraw dang dah thuai anih tur thu leh Aizawl Old Age Home chei that leh a panna kawng siamthat hna thawh thuai anih tur thu a sawi bawk. Heng bakah hian hmalakna hrang hrang te sawiin Pu Lal Thanzara chuan District hospital dangah pawh OPD Card lakna leh thisen test nan upate pual bik intlarna siam vek anih tur thu a sawi a ni. Tun ah hian tar chawmna dawngtu hi MUP member 25,469 an awm thu leh tun dinhmunah heng tanpuina hi nikum September,2016 thla thleng pek ni tawhin March, 2017 thla thlenga pek tur sum hi reiloteah sem chhuah tum anih thu a sawi bawk ani.

MUP Diamond Jubilee Ni-ah hian chhungkaw tin inenlet in, chhungkua-a pi leh pute hi tun ai hian engtiang kawngin nge ngaih pawimawh an nih leh zual theih ang? Tun ai hian zahna leh hlutna engtin nge lantir an nih theih ang? Hmasawn zel theihna zawn theuhah hmalak chuan tun aia chhungkaw hlim leh nuam zawkin a insiam theih theih ngei ang, a ti a. MUP member zawng zawng te inthlahrunga inkiltawih lo tur leh thahnemngai leh phur takin, khawtlang, sawrkar leh kohhran thiltih ah te telpui zel turin a sawm a, zirna in thaber chu kum upate ke bulah ani anlo tih tawh ang hian tawnhriat an ngah zawkna te lehkhabu-a hmuh theihloh finna tamtak kawltu annih angin thalaite leh naupang zawkte fuiha kawng dika khalh ngil zel turin a sawm nghal bawk a ni.

Diamond Jubilee lawmna hi MUP Gen. Hqrs. President, Pu R.K. Thanga chuan a kaihruai a, Pu Sainghinga Sailo, Gen.Secy-in Diamond Jubilee Report a pe a, Dr. Eric Zomawia, State Nodal Officer NCD chuan “Hrisel taka damreina” tih thupui hmangin thu a sawi. He hunah hian MUP member 27 thlanchhuah te chu chawimawina thuziak pek niin, chawhnu lamah a thlawna inentirna (Free Medical Clinic) buatsaih nghal bawk a ni.

Tun dinhmunah hian MUP member 60,000 awmin headquarters 1 leh sub-headquarters 6 an awm mek a ni.