3658/2022-2023
Aizawl, the 22nd February, 2023: Vawiin khan Mizorama a vawikhatna atan phir an taksa a inzawm "conjoined twins" chu Zoram Medical College-ah hlawhtling takin zai hran an ni a, ZMC NICU ah uluk taka enkawl mek an ni. A zaitu Team leader Dr.John Lalliandinga, Associate Professor of Surgery and Paediatric Surgeon, ZMC hovin Plastic Surgeon, General Surgeon leh Anesthesiologist ten darkar 3 chhungin an zai zo a ni.  Thin (liver) pakhat intawm an nih avangin nausen pahnih hi thin pakhatin a chawm zawh dawn loh avangin naute pakhat zawk chhan nan thin hi zai phel a ngai a, tun dinhmunah chuan an pahnih hian la dam ve ve in ZMC NICU ah uluk taka vil ve ve an ni.

Nausen pianghlim zaite hi Lawngtlai district ah February ni 9, 2023 khan an piang a, an awm leh dul a inzawm bakah an thin (liver) a inzawm bawk a ni. Zai an nih hma hian ZMC Radiologist ten contrast CT Scan hmangin an thisen zam inzawm dante an zirchiang hmasa a, test chi hrang hrang an paltlang hnuah hnimhlum thiamte nen inrawnin, an nu leh pa te remtihna (consent) an lak hnuah pakhat zawk talin a damchhuahpui beiseiin zai a ni.

Conjoined twins hi nausen pianghlim an taksa inzawm emaw, taksa peng leh kawchhung inzawm tlat tihna a ni. Khawvelah hetiang hi a vang em em a , khawvela naupiang nuai khatah pakhat a awm thin anga ngaih a ni a. Taksa peng pawimawh 'vital organs' a inzawm an nih thin avangin damkhawchhuak zo lova vanduai palh a awlsam em em a ni.

Attachment

  • Loading attachment...