Vawiin tlai dar 4 khan MZ Agencies te siam Zo Aqua chu Chief Minister Pu Lal Thanhawla'n Sihhmui-ah a hawng.

Hawnna inkhawmah hian Pu Lal Thanhawla chuan thusawiin Zoram pawisa tam tak luangchhuak thin tih tawpna chi khat tui thianghlim siamna vawiinah Zo Aqua MZ Agencies ten an lo din chhuak ta hi ram mipui leh sorkar aiawh pawhin lawmthu ka sawi a ni, tiin Mizote hian kan peih loh leh tih nachang kan hriat loh avangin ram pawnlam mi tam tak ten kan state atangin sum tam tak an haichhuak thin  a.  An tih thin angte hi Mizote tan tih theih loh anih bik loh laiin kan peih loh leh a nachang kan hriat loh avangin hnam dangten nasa takin min run a ni a ti bawk.

Chief Minister chuan ringtu za a za nia inchhal ten thla 3 eikhawp pawh buh kan thar theih loh avangin sum ngainatna ah kan lut tep a, chu chu pathian duh loh zawng a ni tiin vawiin nia hawn tak tui thianghlim vairam tui aia tui zawk kan han nei ta hi midangte pawn thil dang dangah tih theih awmte dap nachang hriat phah a tul thu a sawi bawk.

Zo Aqua, MZ Agencies neitu Pu N. Lalawmpuia chuan report tawi pein May 2009 atangin Zo Aqua tan hian hma an lo lak tawh thu leh approval hrang hrang te lak tur a tam avanga duh aia hmasawn chak a har thu leh tunah hian license leh permit kim chang nei theia an awm tak thu a sawi.

Hawnna inkhawmah hian Pu S. Hiato, PHE Minister pawhin hetiang ang tui thianghlim siam chhuahna tur a awm ta hi lawmawn a tih thu a sawi. Vawiin inkhawmah hian Parliamentary Secretaries Pu Lal Thanzara leh Pu K.S. Thanga te bakah Aizawl atangin mi pawimawh thahnem tak an tel a ni.