Nimin khan Tribal Research Institute, Art & Culture Department huaihawtin “Zo-Nun-Mawi” Seminar Archives Hall, Babutlang-ah neih a ni a. Pu K. Malsawma, MCS (rtd.) chu khuallian niin Pu Ngurbiaka, Director, Art & Culture chuan inkhawm a kaihruai.

Seminar-ah hian Pu C.Laitanga Jt. Director (rtd.), Art & Culture Dept, Pu Lalbiakzuala, Vice President, CYMA leh Pu Zaliana, Sr. Reasearch Officer, Tribal Research Institute te chu Resource Person an ni a. “Lal leh upa-te leh Zawlbuk thuchhuak an zahthiam dan”, “Tualzal nuna Zonunmawi” leh “Inchhung khura Zonunmawi” tih thupui zirho a ni. Khuallian Pu K. Malsawma chuan Mizo hnam nun mawi chawikang a, ti mawi zel turin Aizawl khawpuia cheng, mipui mimir an pawimawh a ni, a ti.

Paper ziaktu Pu C. Laitanga chuan Zonunmawi siamtu ber chu thuawihna a nih thu sawiin thuawihna chu Pathian meuh pawhin a duh ber a ni, a ti a. Pu Zaliana, S.R.O chuan hmanlai Mizo nuna a mawi lai ber chu nu leh pate thu leh aia upate thu an awih theihna kha a ni a ti a. Mihring nun hi mawhphurhna a khat, mawhphurhna hlen tur awm ta lo sela chu mihring nun nawmna hi a chuai dawn a ni tiin mimal leh chhungkaw nunte, khawtlang nunte hi hnam nun Zonunmawi siamtu an ni a ti. .Pu Lalbiakzuala chuan hmanlai angin Zualko tlanna tur awm tawh lo mahsela midangte tanpuina, midangte tana inpekna nun chu a pangngai rengin kan la mamawh a ni, a ti bawk.

Seminar-ah hian chawhnu lam zawng sawihona neih a ni.