Mizote hi in duh tawk lo viau thin mah ila kan hnam nunah zo nun ze mawi duhawm tamtak ala awm a. Thil bo hmuh let leh beisei theihna khawpui India rama awm chhun chu Zofate khawpui chauh hi a ni, Pu P.C. Zoramsangliana Art & Culture Minister – in a ti.

He thu hi vawiin khan Mizoram Upa Pawl General Assembly vawi 40-na Kolasib Diakkawn Hall a neih hmanpuia a sawi a ni a. Upa pawlin an khawmpui thupui atana an thlan ‘Dikna leh Rinawmna’ tih chu tun lai thangthar lehzel tena kan mamawh ngawih ngawih a ni, tiin an Motto ‘Nang malsawmna ni ang che’ tih tenen pawh thil inhmeh tak leh Mizote nunphung dika min hruailuttu tur thuthlung a ni, a ti. Mizo thufing ‘Mi awkhrawl an ding chhuak thin, mahse an tlu leh thuai thin’ tih hi thil dik tak a niin dikna leh rinawmna hi rah tha chhuah tura hmanraw pawimawh tak a ni a, dik lo leh belhchian dawl lova hausate pawhin rah tha an chhuah thei thin lo a ni tiin, dik leh rinawm na na na chu an tu leh fate thlengin an hmuingil thin a ni, Pu P.C Zoramsangliana chuan a ti a. Aia upate zahthiam kawngah pawh tan kan lak a ngai a. Upa pawl te hian ‘ ka tar tawh, ka upa tawh’ ti mai lovin zoram siam kawngah hma i la zel ang u, a ti a ni.

Minister chuan a thil vei zawngte sawi chhuakin tunlai hun tawhah hi chuan kan mithi sawngbawl dan thlirlet a, buaina leh hun khawhral te alo tlem zawk theih nan khawilai Hall emaw a indah a, inphum hun pawh mumal zawka thlir that hun a tih thu te, kan kristiannain kan Mizo Culture tamtak a sawi danglam tawh hnua Hlamzuih kan la nei tlat si te hi thlir chian a ngai ta hle a ni, a ti bawk a. Engpawhnise, Mizote hi Mizo kan nihnaah chiang ila, in tan hnam i ni ang u, a ti a ni.

MUP Assembly hi an pawl President Pu K. Malsawma’n a kaihruai a. Pu Sainghinglova Sailo, Gen. Secy –in report a pe a. Kum kalta chhunga an pawl member thite mi 1470 sunna hun an hmang bawk. Chawhnu lamah rorel inkhawm an nei zui a, hei hi Pu H. Raltawna, Vice President-in a kaihruai a ni.

Tun tuma Kolasiba Assembly neih hi Aizawl khaw pawna neih hmasak ber a ni a. Palai kal an thahnem hle a ni. MUP hian Mizoram chhungah Sub. Hqrs 6 neiin area 73 leh Unit 569 an nei a. Tun dinhmunah member 50,750 an awm a ni. Ram pawn lamah Unit 13 an nei mek bawk.