Nizan khan Berawtlang  Art & Culture Conference hall-ah  Mizo Zaimi Inzawmkhawm (MZI)  chuan an pawl din champha vawi 37-na an lawm a. He hun hi Chief Minister Pu Lal Thanhawla'n hmanpuiin  tuilian vanga tanpui ngai te puala MZI in Charity event hrang hrang a buatsaih zinga HELP|Rock For Mizoram Concert  Music Video album pawh mipui lei theih turin a tlangzarh nghal a ni.

Chief Minister Pu Lal Thanhawla chuan sorkhar in thalaite tana khawvel thar a siam mekah a bikin infiamna khawvelah hlawhtlinna nasa tak a awm chho mek a; zirna lamah pawh hmasawnna liantham awm chho turin theihpatawp chhuah mek a ni a ti a. Mizo mipui in an thiam leh an ngaihnat rimawi khawvelah pawh thalai talent nei tha tam tak an awm a; anni tih hmasawnna leh chawikan nan hian sawrkar chuan ngaihtuahna a seng mek a ti a. Hmarchhak state thenkhat Sikkim leh Meghalaya thalai ten rimawi avanga eizawnna bakah hausakna an hmuh theih chuan anni aia talent nei tha zawk anga mi ten an ngaih, Mizo thalai te an hlawhtlin lohna tur a awm bik lo a ti a. Rimawi khawvela  Zofate an hlawhtlinna tur erawh chuan hnamdang tawng thiam, hnamdang culture hriat leh hnamdang te hriatlar tur a fehchhuah leh inpholan, exposure nasa zawk a pawimawh ber a ti. Rimawi khawvela talent nei tha, hlawhtlin tuma bei, hmathlir nei leh awmze nei a kal te chu pui an ngai a nih phawt chuan sorkhar in theihtawp a chhuah pui dawn a ti a.

"Mizoram chhung kil tinah, thingtlang khawte zawkah te pawh zaipawl tha tak tak a awm vek a. Keini ang hi a state mai ni lo, a ram ang pawhin khawvel hmundangah hian an tam lo maithei; hei hian rimawi kan hmelhriatna a rei loh ang hu in rimawi khawvel a kan san zia a ti lang a. Sum tam tak awmna Bollywood-ah te pawh playback singer te hausak zia kan hria a, an ni tih ang tih theih tum leh kawng dap te pawh hi zofate tana chonna thar ni se ka duh", Chief Minister chuan a ti a. A pawimawh ber pakhat, engkim thiam zung zung nghal thei Zofaten kan hriat tur chu, a hmawrbawk uluk a ni a ti.

MZI in ruahsur, tuilian vanga in leh lo bakah nunna hial chan te tanpui duh a, vawitam tak an fehchhuak chu rawngbawlna ropui tak a ni a ti a. Chief Minister Relief Fund-ah sum tam tak an thehlut chu lawmawm a tih thu a sawi a. CM Relief Fund chu thil pawimawh tak, damlo tanpui ngai te tanpuina, damdawiin atanga intlanchhuak hleitheilo te leh chhiattawh nikhua a mi mimangang te  tanpuina, a awmloh pawh a an mahni sum atang te pawh a an lo thehchhuahna thin a ni a; a pawimawh takzet a ni a ti.  "Eng hna pawh thawk ila kan awmna hmun hi kan rawngbawlna theuh a ni a. Rinawm taka kan hna te thawk chunga tanpui ngai apiang te puih duhna thinlung put leh pui tura pawha  pen chhuah hi khua leh tui tha te mawhphurhna a ni", a ti.

MZI 37th Rising Day lawmna inkhawm hi an pawl President Pu Lalrinmawia Ralte, MLA in a kaihruai a. He hunah hian MZI member fam ta  - Pu Michael M. Sailo leh Nl. JH Lalmuanpuii (Mami), Mamit  te sunna hun  hman a ni a. MZI General Secretary Isak Malsawmtluanga'n an pawl hmalakna leh hmachhawp te a puangzar a ni.

MZI in an hmalakna leh hmachhawp a tarlan dan chuan MZI Artist te minimum wage/ vawikhat  zaina a hlawh  hniamber  chu Rs.3500 a ni a. Tunah hian MZI chuan  Band tan minimum wage a  siam leh mek a , hlaphuahtute tan  pawh an hla hralh theihna tur digital market buatsaih mek a ni. Tin, India ram chhung leh pawna zaimi te an fehchhuah awlsam zawk nan Website buaipui mek niin hetih lai vek hian Company pakhat nen a  Music Fest 2017 huaihawt an tumna pawh chak tak a kalpui mek a ni.

Tunhnaia  ruahsur, tuilian leh leimin avanga  harsatna tawktute puala  MZI General Headquarters in Charity Event hrang hrang a buatsaih atanga sum a hmuh zawng zawng chu Rs. 8,61,577/- a ni a. Heta tang hian CM Relief fund atan Rs.2,00,000/-, Tlabung khaw tan Rs. 1,02,500/-, Phairuangkai khaw tan Rs.1,01,300/-, Sairang khaw tan Rs. 1,00,000/-, Saron Veng tan Rs.1,00,000/-, Marpara 'S' khaw tan Rs.1,01,500/-, Changpui khaw tan Rs.1,01,200/- leh Kolasib MZI  hnenah Rs.55,077/- ,ah te sem sawm a ni.