1848/2025-2026

Champhai, dated 10th October, 2025 : Forest Minister Pu Lalthansanga chuan Champhai Bethel Community Hall, Chhura hmuna buatsaih “State Handloom Expo” chu vawiin chawhnu dar 1:00 khan a hawng. State Handloom Expo hawnna inkhawm hi ZOHANDCO Manager Pu C. Lalrinmawia’n a kaihruai a ni.

Khuallian Pu Lalthansanga chuan ZOHANDCO-in State Handloom Expo Champhaia buatsaih a ni chu lawmawm a tih thu a sawi a, Kutthemthiamna hian ram Economy a chawi kang thei a, Handloom-ah hian theihna nasa tak kan nei tih hriain Khawvel mithmuha Puantah leh thiamhnangdeh hmanga kan in phochhuah theihna turin Sorkarin hma a lak mek zel a ni tih a sawi a. Mizoram Traditional Dress te hi hnam dangin min hlutpui hle angin chawi nun zel a tul thu a sawi a, Kut themthiamna hmanga eizawngtute chu mahni kutkea dinga mahni inpuih hmasak tum turin a chah. Kuthnu mam leh pawr lo, belhchian dawl nei tura tang thar tur leh thlen china lungawi mai lova, midangte aia tha bik ni thei tura ngaihtuahna tam zawk seng turin a ngen bawk a, dawrtute tana dawr nuam leh hawihhawm tak nih tum turin a chah a ni. Mizoram mai nilo ram chhung hmun dang leh pawn thleng pha thei tura thil siamte cheibawl kawnga ruahmanna neih a ngaih thu leh hnam dangte pawhin an duhtlan theih tur zulzui hralh kal thei tur ngaihtuah chhuah tum turin a chah a. Mizoram chhung mai bakah State pawn thlenga buatsaih thin Handloom Expo a tel thei tura inruahman tur leh, kut themthiamna bakah thluak themthiamna nei tura tanlak a ngaih thu sawiin, Mipuiten tangkai taka an hman theih nana duhsakna hlanin State Handloom Expo 2025 chu mamawhtu apiangte dawr thei turin a hawng a ni.

He hunah hian Pu JK Dawngzuala, Chairman ZOHANDCO pawhin thu sawiin Pu Rodingluia Asst Manager in lawmthu sawina a nei a ni.

State Handloom Expo ah hian stall 60 siam niin Mizo thuam chi hrang hrang phochhuah a ni dawn a ni. Expo hian October ni 25 thleng a awh dawn a ni.

State Handloom Expo hawnna inkhawm hi  Champhai Bawrhsap Pu Mohammad Aaquib leh sawrkar hotu thahnem tak an tel.