No.7746/2020-2021

Kolasib Dated 9th March 2021: Vawiin chawhma khan Dr.H.Lalthlangliana, Deputy Commissioner hovin Zophaia leilet enkawl chhunzawm dan tur relin thutkhawmna neih a ni a, SP Kolasib, Zonal Executive Magistrate, Village Council hruaitute, NGO hrang hrang aiawhte leh leilet neitute an tel a ni.

Dr.H.Lalthlangliana chuan thutkhawmna hun kaihruaiin, Zophaia ramria kan ngaih hmun a leilet awmte kan enkawl chhunzawm dan tur chu kan ram hauhna kawnga thil pawimawh tak a nih dawn avangin tlawmngai pawl hrang hrang hruaitute an tel chu a tul hle a ni, a ti a. Heng hmun a leilet leh ram neitute chuan harsatna an tawh lohna turin Sawrkar thuchhuak anga tih tur leh tih loh tur duante chu zawm tum tlat turin a chah bawk a ni. Deputy Commissioner chuan Zophaia leilet neitute chu a neitute ngeiin an ram an enkawl thei lova, ramdang mi an chhawr duh a nih pawhin, dan ang thlapin ILP an nei ngei tur a nih thu leh intiamkamna felfai tak an siam ngei tur a nih thu a sawi a. Zophaia buaina thleng thin chu hnamdang enkawl tur a ram nei, intiamkamna mumal awm lo leh a neituten an vilpui ngai loh avanga an mi chhawrten an ta neih tak thin vang nia a lan thu a tarlang bawk a ni. 

Dr.H.lalthlangliana chuan Zophai leilet enkawl chhunzawm dan tur chu ram leh hnam pum ang pawh a thil pawimawh tak a nih angin heng hmun a ram neitute chuan Sawrkar thuchhuak ngai pawimawh turin a chah a, ram neitu kohte zing a kal lo engemaw zat an awm chu pawi a tih thu a sawi bawk a ni. Ramria ngaih, Zophai hmunah hian funkim zawk a hmasawnna hna, Integrated Development Scheme, duan mek a nih thu DC chuan a sawi a, hemi hi kalpui hlawhtlin anih theih nan Bairabi khua mipuite nena thawhhona tha neih a tul thu a sawi bawk a ni.

Vawiin thutkhawmnaah hian Joint VC, Bairabi chuan Zophai hmun a leiletahte hian hnam dang mi chhawr an nih loh nan hma an lak mek thu an tarlang a, Central YMA, MZP, MSU leh Bairabi khawtlang hruaitute atangin thusawi ngaihthlak niin Zophai hmun chu mimal, pawl emaw political party anga hmingthat tum vanga hmalakna awm lo tur a an duh thu an sawi a. Hmasawnna chak zawk a awm theih nan sawrkar hmalakna tithuanawp zawnga chetna awm lo turin leh sawrkar thu ngaihchan thin a pawimawh thu sawi a ni bawk a ni.

Zophai hmunah mi 46-in leilet nei ang a chhinchhiah a ni a, March 2021 thla ral hma hian hemi hmun a leilet nei, kohna dawng ve lote chu President, Village Council, Bairabi North hnen a in hriattir tur a ruahman a ni bawk a ni.

Zophaia leilet neitute zawm tur chu District Magistrate, Kolasib chuan ni 17 February, 2021 khan a hnuai ami ang hian a tichhuak a ni;

Bairabi Zophai-a leilet nei zawng zawngte an leilet enkawl chungchangah a hnuaia kaihhruaina hi zawm theuh tura hriattir an ni.

1. Leilet hnathawka an chhawr reng reng a theih chen chenah zohnathlak ngei chhawr tum tur a ni.

Leilet hnathawk chhawr tur zohnathlak hmulo tan Mizoram khua leh tui diktak chauh chhawr tum tur a ni.

3. Leilet hnathawk chhawr tur, a chunga Sl. No 1 & 2 a sawi zohnathlak emaw Mizoram mi leh sa diktak emaw chhawr tur neilo chuan a hnuaia mi hi an zawm ngei ngei tur a ni.

i) Hnamdang Mizoram pawna mi chhawr reng rengin, an mi chhawr turte dan angin ILP an siamsak ngei ngei tur a ni.

ii) ILP siamsak lova hnamdang chhawr an awm anih chuan an chungah dan anga action lak a ni ang.

4. State pawn leh chhunga hnamdang mi chhawr reng rengin an mi chhawrte an chhawr hmain intiamkamna (agreement) felfai tak an ziahpui ngei tur ani a. Intiamkamna (agreement) an siamah hengte hi tihlan ngei tur a ni. Agreement copy hi DC Office Kolasib-ah theh luh tur a ni.

i) A neituin rem a tih chen chauh an leileta chen leh enkawl phalsak an ni tih thu ziah tel tur a ni.

ii) Agreement hi hunbi/hunchhung neiin siam tur a ni.