Zoram hi tu ta nge tia kan in zawh chuan Zofate ta a ni kan ti thin a, cheibawla tinuam tur leh tihmingtha tur hian ram leilung faten mawh kan phur a ni, Home Minister Pu R.Lalzirliana’n a ti. He thu hi vawiina Mizoram Mistiri Association (MMA) General Assembly vawi-6na, Chanmari YMA Hall-a neih mek a hmanpui tuma a sawi a ni.

Home Minister chuan Mizoram hi ram tha, engkim that duhna hmun tiin kan sawi thin a, he ram chei tur hian Mizo mipuite hian mawhphurhna kan nei tih kan inhre tawk lo, a ti a. Ngaw dur khup leh hring cham dur kan neih thin kan thiat zel a; changel, kangthai leh buar hmunah a chang zo tawh tiin mihringten kan mamawh em em boruak tha leh tui hna min siamsaktu, chakkhai tinreng kan lamna kan ngaw te hi humhalh nachang kan hre tur a ni, a ti. Pu R.Lalzirliana chuan mahni kutkawih ngei hmanga eizawngtu Mistiri rualte zinga hun hman chu nuam a ti, tih sawiin Mizoram chhunga hmasawnna ruhrel engemawzat ding tawh leh ding mekah hian sul hnu an nei ve em tih inngaihtuah turin a chah a. Contractor leh mimal in sa ten hnam dangte aia Mizo Mistiri-te ngei chhawr an chak theihna turin rinawmna leh taimakna neia mahni hnaah hmasawn tum turin a fuih a ni. Hnathawktuten hlawh an duh ang bawkin a chhawrtuten hna thawk tha an duh a, kan ram atanga ram danga sum tam tak luang chhuak thin ti kiam tur leh hna hmulote tana hna hmuhna remchang siam turin Mizo leh Mizo ngei kan in chhawr a tul a, chumi tipuitling thei tur chuan a thawktu Mizo Mistiri rualte pawhin inenfiah an ngaihna laiah inenfiah se a duh thu a sawi bawk.

MMA General Assembly vawi-6na hi vawiin nileng khan neih niin chawhma rorel inkhawm chu an President Pu R.Zosiamliana’n a kaihruai a. Chawhnu programme chu Vice President Pu A. Thangtluanga’n a kaihruai thung. Thu pawimawh hrang hrang an rel bakah hruaitu thar thlanna hun an hmang bawk a ni.