No.1999/2020-2020  

Zoram Medical College chuan ZMC laboratory a tunlaia swab sample test chungchang a hnuai ami ang hian mipuite hriat turin a sawifiah.

“ZMC Covid-19 laboratory ah April ni 7, 2020 atang khan RT-PCR khawl hmanga Covid-19 sample testing neih tan niin, tunah hian sample 3906 chuang hi test a ni tawh a. Tunhnaiah hian sawrkar thuthlukna in sawrkar Quarantine Facility (QF) a awm mek leh chhuak tawh zawng zawng leh lo haw apiangte chu RT-PCR khawl hmanga an sample hi test tur a ruahman a ni a. Amaherawhchu, tuna Quarantine Facilities-a awm mekte atanga sample lak bakah hian sample test tur awmsa (backlog) a la awm avangin duh angin test a chak thei lo deuh a ni. 

Imphal a hmunpui nei Government of India,Ministry of Biotechnology hnuaia awm Institute of Bioresources & Sustainable Development (IBSD) atangin RT-PCR khawl thar neih belh a ni a, hemi bakah hian Automated RNA extractor SDRF sum hmanga lei a ni bawk. Heng khawl te hi hman theih tura ruahman (caliberation) leh enchhin phawt (test run) ngai an ni a, heng te hi bun fel tak tak a nih chuan, tun aia nasa in test tam lamah hma kan sawn dawn a ni. Amaherawhchu, khawl hman tur *reagent* hrang hrangte hi  kan leina hmun atangin tam tham tak vawikhatah lei theih a ni lova , hengte avang hian RT-PCR test hi tun dinhmunah chuan duh anga tamin kan ti thei rih lo a ni. Tunah hian nikhatah samples 400 chuang test thin a ni. Hun reilo te-ah tun aia tam zawk test ti thei turin hmalak mek a ni.”