Vawiinah khan Mizoram mipui ten ‘Remna Ni’ champha phak vawi 30 na chu Mizoram hmun hrang hrang ah urhsun tak in an hmang. He ni lawmna pual a vantlang inkhawm lianber chu Sipai Lammual, Aizawl ah hman a ni a, District khawpui zawng zawngah Remna Ni champha hi ropui taka lawm a ni bawk. Sipai Lammual a Remna Ni puala vantlang inkhawm neih tak chu  Remmna Ni Organising Committee in a kaihruai a; Mizoram Governor Lt Gen Nirbhay Sharma (Retd) chu khuallian niin Mizoram Chief Minister Pu Lal Thanhawla chu khualzahawm a ni thung. 

Remmna Ni Organising Committee ah hian Mizoram chhunga  Political Party zawng zawng te, Kohhran  hrang hrang te aiawhtu MKHC leh NGO aiawh in CYMA, MHIP, MUP, MZP leh MSU an tel a. Committee hmalakna bawhzui, kaihhruai leh khaikhawm hna hi CYMA in a kalpui thung a ni. 

Governor Lt Gen Nirbhay Sharma (Retd)  chuan  Mizoram mipui te hnenah Remna Ni pual in lawmpuina leh duhsakna hlan hmasa in  Mizoram ah remna leh muanna in kum 30 thum hmel a hmu thei chu ropui a tih thu a sawi a. He remna leh muanna hlu tak  a awm theihna tura an nunna hlutak ram tan alo hlan tawh zawng zawng te chu Mizoram mipui in an ngaisang a, an thiltih ropui tak te chu Mizoram awm chhung chuan theihnghilh a ni ngai tawh lovang a ti.  

Kum 1986 June  thla ni 30-na ni ah MNF hruaitu Pu Laldenga,  Union Home Secretary Pu R.D. Pradhan leh Mizoram Chief Secretary Pu Lalkhama te chuan khatih hun lai a Chief Minister Pu Lal Thanhawla leh mipawimawh tak tak te hma ah  Mizoram Accord, 1986 chu ziah fel a nih thu tarlang hmasa in chu thuthlung ziah fel a nih rual chuan Mizoram pumpui ah remna leh muanna duhawm tak chu a lo awm ta a ni a ti. Indo tura penchhuah aiin remna kawng zawng tura inphahhniam ngam nih a ropui zawk thu sawiin MNF ten an ralthuam kal san a Mipui mipui te hmakhua ngai tak chunga inremna dawhkan an kil thei chu fak phu  a tih thu a sawi a. An thiltih huaisen thlak tak kha  Mizoram mipui ten an ngaisang in a chhuang takzet a ni a ti a.  Remna thuhlung ziahfel a nih theihna tura political party hruaitute, kohhran mi te, huaisen taka Mizo mipui te tawrhna auchhuahpuitu Mizoram Journalist hmasa te leh buaina kar ah pawh mipui tana bahlah lova hnathawk thin sawrkar hnathawk te thawhhlawk zia te chu Zoram mipui in an theihnghilh lo a ni a ti.  

Governor chuan kum 20 chhunga Mizo mipui te tawrhna chu a thlawn mai lo a ni ti a. Kum 20 chhung rambuai khan Mizo mipui te hnenah remna leh muanna hlutzia hriatthiam tir in Mizoram ah Remna thluthlung zawng a zinga  hlawhtling ber pawl tun thleng in a lo awm phah a ni a ti. Remna Ni chu Zoram mipui te thawhrah a nih thu tarlang in mipui te thlawp loh chu eng ang remna thuthlung tha ber tura  duanchhuah pawh a ni se a hlawhchham thuai thin a ni a ti a. Kum 30 chhung emaw lek chhunga  Mizoram hmasawn chak zia chu mak a tih thu a tarlang a. State naupang tak si India ram pumpuiah State lekhathiam ber zingah chhal theih ni tura Mizoram a lo awm ta hian Remna leh Muanna vanga Mizoram hmasawn chakzia leh Mizo te theihna san zia a ti lang chiang em em a ni a ti. Mizoram tana hun pawimawh leh nasa taka inthlak danglam chho meka cheng Mizo thalai te kaihthawh nan Remna Ni kaltlanga thurawn pek chu rem chang a tih thu tarlang a. Relkawng, kawngpui thazawk, Act East hmalakna, KMMTTP leh Ramri hrula indawrna pung chho mek chuan kar lovah Mizoram chu sumdawnna hmunpui leh hna thawhsen loh awmna hmun ah a siam dawn tih thalai ten an hriat a ngai a ti. Tun dinhmunah Mizo thalai te inpuahchahna a duhkhawp loh thu sawiin Mizo thalai te chuan Mizoram tana hunlawmawm lo inherchhuak thut atan hian an inbuatsaih tha tawk tawh em tih inzawt theuh se a duh thu a tarlang. Mizo thalai te inpuahchahna hmasa ber tur chu hriselna ngaih pawimawh leh ruihtheih thil bansan a zuk leh hmuam sim a ni a ti a. Hriselna bakah Mizo thalai ten an khawvel tukverh zau zawka hawn, a rang lam a hnathawhtur chi hrang hrang thawh thiam zir bakah Mizo tawng ni lo, tawng dang tam zawk thiam a pawimawh thu tarlang in tawngdang thiam loh vangin Mizo thalai chhuanawm tak ten an nih theih tur leh thlen theih chin an thleng pha lo fo a ni ti. 

He hunah Khualzahawm Chief Minister Pu Lal Thanhawla chuan zalenna sualtute, martar te leh Mizoram mipui zawng zawngte Remna Ni chibai bukin rambuai khan angkhatin Mizo mipui zawng zawng a nghawng a, mi lian leh mite, mi hausa leh mi rethei te a thliar lova tiin kawng hrang hrangin harsatna leh tawrhna in Mizo mipui te a tlakbuak thu leh kawng tin renga Mizoram dinhmun a tlak hniam thu a sawi a. Rambuai kha politics buaina  ani a tiin sipai chakna leh silai thiltih theihnaah senghawi chi a ni lova, politics bawka seng hawi a ni a. Kohhran ho tawngtaina te, khawtlang, political party leh tlawmngai pawl hruaitute leh 1975 a din Peace Advisory Committee te inpekna an hnathawh leh an hmalakna avanga remna leh muanna kan nei hi a ropui a ni, a ti. He remna leh muanna hi Mizoram mipui bakah hmun hrang hrang a cheng Zohnahthlak te ta anih thu sawiin remna leh muanna hi a man a to a, a vawnhim man pawh a to a, a man a to hle pawhin a man pek kan inhuam tur a ni tiin remna leh muanna vawnghim a, a chhe lai a awmin, a chhe lai siamthat hna chu kan zavai mawhphurhna a ni, a ti bawk. 

Pu Lal Thanhawla chuan YMA kaihhruaina hnuaiah Remna Ni hi a hrang hranga hmang lova, a huhova hmun pakhat a an remhriatna leh an ngaituahna hmanga Remna Ni lawmna hun leh thangthar ten remna leh muanna a hlutzia an hriat theih nan a hetiang programme an buatsaih chu lawmawm leh ropui a tih thu a sawi a. Remna leh muanna hi Zohnahtlak zawng zawng ta a ni a, kan dawnsawn thiam a pawimawh a ni, a ti a. Ram hi Pathian min pek ani a, a that leh a chhiat a ram leilung faten angkhatin mawh kan phur a ni tiin Mizo mipuite chu remna leh muanna atan inpe chhunzawm zel turin leh neitu rilru pu a ram hmasawnnaah rinawmna, dikna, taihmakna leh Pathian tihna nung nen kawng engkima sawrkar tawiawma hma la tura Mizoram mipuite chahin leh hmun hrang hranga awm Zofate chu Remna Ni duhsakna a hlan a ni. 

Lammual a buatsaih, Remna Ni inkhawm hi CYMA Vice President  Pu Vanlalruata, Vice Chairman, Organising Committee in kaihruaiin he hunah hian zai leh thusawi ngaihthlak a ni bakah hnamlam chi hrang hrang thlir ho a ni a. Pu Zoramthanga, President, MNF, Pu Lalduhawma, President, ZNP, Pu Lalhmangaiha Sailo, President, MPC, Pu JV. Hluna, President, BJP, CYMA President Pu Lalbiakzuala, ,Chairman, Organising Committee ni bawk leh Pu J.Lalsailova, Treasurer, Organising Committee ten Remna Ni pual hian thu an sawi a ni.