Mara Hnam zinga politician hlun, CEM leh Minister hlui, Kohhran lama nemngheh Upa, Pu Zakhu Hlychho lehkhabu ziak Marate Tobul tih chu vawiin chhun khan I & PR Auditorium-a inkhawm tawite buatsaihah Industries Minister Pu S. Hiato chuan a tlangzarh.

 

 

Art & Culture Department published Mara Hnam Tobul leh an chanchin tlangpui tarlanna lehkhabu phek 232, a chhunga thlalak hlu tak tak thehnem fe dah khawmna, Rs. 80 a hralhchhuah tur tlangzarh inkhawm hi Dr. K. Robin, Asst. Prof. MZU in a kaihruai a. Lehkhabu chhung thu Pu B. Lalthangliana, Sr. Lecturer, Hrangbana College chuan sawizauin thlirlawkna hun a hmang.

Tlangzarhtu Minister Pu S. Hiato chuan sum leh pai leh tawng lama hnufumna hian politics thlengin nghawng a nei thei a ti a. Mizo hnahthlak zinga Mara te pawh Mizoram chhim tawp lama khawsa, tawng hmang tute pawh a tlem zawk an nih avangin politics lamah te pawh hnufumna thui tak an nei thin a ni a ti a. District Council nei Mara, Lai leh Chakma te ai zawka hnam tenaua ngaih theih Mizo hnahthlak zinga engemaw zat awmte hi dawmkanna an hmasawnna tur hmakhua ngaihtuah pui chu sorkar thil tum leh ngaihpawimawh hmasak mek anih thu a tarlang. He lehkhabu Mizotawnga buatsaih anih chungchangah a ziaktu chungah lawmthu sawiin zirlai, research beitu leh Mizoram mipui mimirin an chhawr tangkai a hnam leh hnam, chi leh chi inkara inunauna leh inpumkhatna thlentu hmanraw tangkai tak anih a duhsak thu Pu S. Hiato hian a sawi a ni.

Lehkhabu ziaktu Pu Zakhu Hlychho pawhin a in buatsaih dan tlangpui tarlangin rorelna khawlah a tel tak loh atangin lehkhabu ziaka mipui leh kohhran rawngbawl chu Pathian kohna nia a hriat thu a sawi a. A hun awl chu lehkhabu ziak nan hmanzui zel a tum thu kalkhawm mipuite a hrilh a ni.

Lehkhabu tlangzarh inkhawmah hian tualchhung chanchinbumite, zirtirtu engemaw zat, sawm bik te bakah Pu PP Thawla, MLA leh Evangelical Church of Mara Land Moderator Rev. P. Riabi te pawh an tel.