Vawiin khan Mizoram sorkar hnuaia Group ‘A’ officer chin chung lamte chu Aizawl Vanapa Hall-ah koh khawm an ni a. He hunah hian Mizoram Chief Minister Pu Lal Thanhawla chuan a kaihhruai sorkar tharin inrelbawlna a kalpui dan tur tlangpui sawiin Group ‘A’ Officer-te chu that leh that inlawma, inkawprem tak chunga thawhpuiah a sawm a ni.

 

 

Vawiina inkhawm hi Chief Secretary Pu Van Hela Pachuau, IAS-in a kaihruai a, Assembly Speaker Pu R. Romawia, Minister zawng zawng bakah Parliamentary Secretaries 4 leh MLA engemawzat an tel a ni.

Chief Minister chuan sorkar officer-te chu sorkar neitu tak tak zawk an nih avangin sorkar tha, fel leh fai, inrelbawlna dik kawngah an pawimawh hle a ni, a ti a. Chuvangin hun vawn dik (punctuality) leh inthununna tha (discipline) an vawng reng tur a ni ang a, hnaa rinawm leh taimak bakah hawihawmna nen hnathawk turin a chah a ni. A kaihhruai sorkarin a ngaih pawimawh hmasak thenkhat tarlangin chungte chu retheite chhanchhuah, thalaite tana khawvel thar din leh hlemhletna umbo te sawilangin Pu Lal Thanhawla chuan sorkar officer-te chu an finna leh remhriatna thahnemngai taka thawh turin a sawm a. Sorkar kum tin sum ruahman pangngai bakah sorkar laipui atangin sum haichhuah tur thahnem fe awm te chu zirchianga haichhuah tum turin a hrilh a. Hei hian anmahni hna theuha an fel leh tlin te pawh a hril ang, a ti. Sorkar kalphungah a chhe lai siamthat tur pawh engemawzat a awm thu sawichhuakin Chief Minister chuan hemi kawngah hian Dan a lal ber tur a ni ang a ti a. Corruption chu sorkarah a hluar ber a, a dawtah sumdawnnaah leh mipui mimir-ah pawh sum duhawmna awm hial tawh nia sawiin a dona kawngah Dan hmanga hmalak a nih pawhin na deuh pawh a awm mai theih tur thu Chief Minister chuan a sawilang bawk. Sorkar hnathawkte chu kan ring tawk a, thawhpui kan duh a, chuvangin an hamthatna leh hmakhua pawh kan theihnghilh bik lovang, Chief Minister chuan a ti.

Home Minister Pu R.Lalzirliana pawhin Officer kalkhawmte fuihna thu tha tak sawiin Mizoram chhunga thil duhawm lo leh pawi khawihna hrang hrang thlen tamna chhan ber nia a hriat te chu khawchhak lam unau atangin a ni, a ti a. Khawchhak lam atanga lo kal zawng zawngte hi an sual vek loh laiin mi tlemte pawikhawiin an hming a tichhe thin a ni, a ti a. Chuvangin hetiang pawikhawih chingte chu Mizoram chhung jail-a tan tir mai lovin Burma sorkar-ah hlan zel an ni tawh ang, a ti. Mipui thlan MLA-te chu rorel lai an ni emaw Opposition an ni emaw, sorkar hnathawkte hian an zahin an thu leh hla ngaichang turin a ngen bawk.

Vawiin inkhawm-ah hian MUP Gen. Hqrs. President leh Mizoram Civil Pensioners’ Association President ni bawk Pu H.Raltawna, IAS (Rtd) pawhin thutawi a sawi a. Mizoram Chief Minister-in Adviser hranpa nei lova sorkar officer-te a rin tawk avangin rinawma, ringtu lakah sorkar officer-te chu an rinawm let ve tur a ni ang, a ti.

Vawiin Group ‘A’ Officer kalkhawmah hian Vanapa Hall khatin Sorkar hotulu pawimawh Commissioners & Secretaries leh Department hrang hrang officer-te an kal a ni.