Tun hnaia Mizoram khawthlang lama Mizo leh Bru inkara buaina awm leh hemi chungchanga Asian Centre for Human Rights (ACHR)-in dik lo taka sorkar laipuia Mizoram sorkar an puhna chungchangah vawiin khan Home Minister Pu R.Lalzirliana chuan chanchinbumite kawmin Mizoram sorkar chuan Bru lo kir te chhawmdawlna turin theihtawp a chhuah zawk thu a hrilh a ni.

 

 

Home Minister Pu R.Lalzirliana chuan ACHR ten Mizoram sorkar atangin thu belhchian dawl zawt hmasa lova sorkar laipui hnenah Bru tiduhdah leh hnam thliarna rilru pua an puhna chu a dik lo hulhual a ni, a ti a. Kum engemawzat kal ta atang khan khawthlang lamah Mizo leh Bru inkarah buaina a thlen thin thu sawiin Home Minister chuan tun hnaia Zarzokima, Bungthuam khua thah chungchangah pawh sorkar chuan a rang thei berin hma lain, buaina a zual loh nan police a tirh thlak nghal thu a sawi a. Khaw hala inhnamhnawih mimal/pawl te pawh chhuichhuah mek an ni, a ti. Tun hnaia buainaah khan Bru khaw 14 zinga 7-ah Bru in hal sak an ni a, hemi avanga Bru awm zawng zawng ten Mizoram an tlansan tia sawi chu a dik lova, Mamit D.C. atanga thudawn danin mi 500 vel chauhvin Mizoram an chhuahsan leh rin a ni a. A tam zawk chu an in a kanchhiat vek avangin awmna tur mai an neih loh vang a ni, a ti. Mizoramah hnam tenau (minority tribe) 3 - Gorkhali, Chakma leh Bru (Reang) - te an cheng ve a, Mizoten Gorkhali leh Chakma te nena buaina an neih ngaih loh thu sawiin Pu Zira chuan Mizo leh Bru inkara buaina a chhuah apiangin tharum thawh hmasa zawk chu Bru an ni ziah a ni, a ti. Chuti a nih laiin Mizote zawk Bru chunga hlei nei bik leh tihduhdah thin anga sorkar laipui leh media lamahte sawichhiat an nih thin chu sorkarin a ngaimawh hle a, thudik puanchhuah zel hi a tul tak zet a ni tiin Home Minister chuan thu dik lo/belhchian dawl lo thehdarh lo turin a ngen a, boruak muanawm zawkah sorkar tan pawh chhawmdawlna hna a thawh that theih zawk a ni tiin state, regional leh national media zawng zawng te a chah nghe nghe a ni. Mizoram state chhunga remna leh muanna boruak tichhe zawnga che emaw tharum thawh te chu engtikawng mahin sorkarin a tuar dawn lo a ni, a ti bawk.

Vawiina Home Minister-in chanchinbumite a kawmnaah Parliamentary Secretary Pu Lalrinmawia Ralte pawhin Minister hi a tawiawm a ni.