Vawiin chawhnu dar 01:00 khan 28 Hrangturzo Assembly bial Bye-Election atan eptu party inzawmkhawm pawlte United Democratic Front (UDF) aiawhin Pu H. Lalduhawma chuan Returning Officer leh Serchhip District Election officer ni bawk, Dr. Franklin Laltinkhuma IAS hmaah thutiam lain nomination a file ve ta.

Pu H. Lalduhawma hi Pu Zatluanga (L) fapa niin Aizawl Venghluia khawsa mek a ni a, tunah hian kum 57 mi niin zirna lamah chuan PUC passed a ni. Afidavit atanga a lan dan chuan UDF Candidate Pu H. Lalduhawma bungraw che thei hlutzawng chu cheng 19,70,259/- a ni a, tin a bungraw che thei lo hlutzawng pawh cheng nuai 60 hu niin a hausakna zawng zawng hlutzawng chu cheng 79,70,259/- a ni.

MLA General Election neih zawh takah khan Pu H. Lalduhawma hi hrangturzo bialah hian ZNP party hmingin a lo ding tawh a, hemi tum hian vote tla zawng zawng 12276 ah vote 3412 hmuin pathumna a ni a, he bial atanga lo thlan tlin tawh Pu Lal Thanhawla chu vote 1761 in a pha lo a ni.

Vawiin hi he bial chuh tum tana nomination file theih ni hnuhnung ber a nih tawh avangin Pu H. Lalduhawma UDF leh Pi Vanlalawmpuii Chawngthu INC te pahnih hi an inmalbeih dawn niin a lang.