Kan hma lawka Lok Sabha MP thlanna tura inpuahchahna kal zelah vawiin khan Kolasib DC Office-ah First Level Checking of EVM ( EVM endikna hmasa ber) neih a ni a. Hemi hnu hian Mock Poll neih zui nghal a ni.

Vawiina EVM checking thawhkhatna hi EVM Observer Pu H. Laizika, MCS leh Kolasib District Election Officer Pu Jitender Yadav, IAS bakah Pu R. Lalnghakliana, Election Officer leh party aiawhte uapna hnuaiah neih a ni a. EVM siamtu BEL company mi thiam ten heng checking tehi an nei a ni. Hemi hnu hian party aiawh ten Mock Poll an nei zui nghal a. He mock poll hi naktuk thleng neih a ni ang.

Kolasib District chhunga MP inthlanna atan hian EVM 130, BEL company siamte chuan tun hnai khan him takin Kolasib anlo thleng a. VVPAT ( Voter Verifiable Paper Audit Trail ) 100 pawh Kolasib-ah hian a thleng tawh bawk a ni. Tun tum hi Kolasib District chhunga VVPAT hman hmasakna ber tur a ni a. He thil hi Vote thlaktuin a vote thlak duhna ngeiah a thlak em tih lehkha hmanga lantir nghal thei khawl a ni a. Inthlan result-ah rinhlelhna emaw complaint emaw a awm chuan he khawlin vote thlaktute vote thlak zawng zawng paper hmanga alo print chhuah thlap hmangin awlsam leh rintlak takin a endik leh theih vek dawn a ni.

Kolasib District chhungah hian polling station 76 a awm a, voter 53121 an awm a ni.