Tukin zing kar khan “Zirtirtute Ni” (Teachers’ Day) denchhenin Aizawl District huamchhunga sikul thlanchhuaha zirlai thahnem takte chuan a huhova tlan (Joint Rally) an neia, Aizawl Sipai Lammual-ah intawkkhawmin, hetah hian inkhawm tawi buatsaih a ni.
He hun hi Pu B. Lianthlira, District Education Officer, Aizawl District chuan a kaihruai a, Pu B.Lalchhuanliana, School Education Addl. Director chu Khuallian niin, Education Minister Pu Lalsawta’n he Ni puala a thuchah chhiarchhuahna hun Pi Zoliani Hnamte, SDEO, Aizawl East chuan a hmang bawk.
Education Minister Pu Lalsawta chuan zirtirtu thawk mek leh lo thawk tawh thinte chu duhsakna chibai bukin, kumina zirtirtu chhuanawm tak tak, National leh State Award dawngtute chu a lawmpui takzet thu a sawi bawk. Khawvel thar mamawh mila kan rama zirna her rem turin Sorkar chuan Education Reforms Commission leh Education Policy zulzuiin hma chak takin a la zel a, zirlaiten ramchhung leh pawna eizawnna ngelnghet nei tura thiamna an neih theih nana Chief Minister-in Mizoram Skill Development Society (MSDS) a din chu chak taka kalpui zel anih thu a sawia, Polytechnic thar paruk nei turin hmalak mek a nih thu a sawi bawk. Midday Meal hmangin sikul naupangte’n chawchhun bakah damdawi tha an dawng a; DoNER, MHRD (UGC) te hmangin Mizorama college tam tak building sak mek anih thu a sawi bawk. Computer hmanga zirna, Computer Aided Teaching (CAT) pawh bultan ni tawhin, Continuous and Comprehensive Education (CCE) pawh hlawkpui taka kalpui mek a nih thu a sawi bawk.
Education Minister chuan zirlaibu thiamna bakah zirlaite taksa sawizawina atan infiamna uar belh zel a nih bakah, zirnaa hmanraw pawimawh tak, Mizotawng, English leh Hindi-ah te hma kan sawn lehzual nana zirlaibu tihdanglam leh tha zawka buatsaihte chu kan tangkaipui hle a ni, a ti a. Zirtirtu zawng zawngte chu inpekna thar nen thawk chhunzawm tur leh, mihring nih phung nun dan tha leh mawi chungchangah zirlaite entawn ber an ni tih hre renga hmangaihna leh duhsakna tak tak nena zirtir turin a chah bawk a ni.
School Education Addl. Director, Pu B. Lalchhuanliana chuan zirtirtu tha chu khawtlang nun siamthatu an nih thu leh, ram tana mi tangkai tak tak chherchhuaktu an ni, a ti a. Zirlaite chu anmahni chhertu zirtirtute hre reng turin a chah bawk. Thusawitu dang Pi Angela Zothanpuii, Addl. DC pawhin zirlaite chu social media kaltlanga zirtirtute sawisel ching lo turin a chah a ni.
Kumin hian National Award dawng zirtirtu pahnih, Pu C. Hualrikhuma, Govt. Champhai High School Teacher, Champhai leh Pi F. Lalramliani, Headmistress, Dawrpui Model Primary School, Aizawl te an ni a. State Award dawngtute hi Pu H.T. Vanlalsawma, Teacher, Govt. Champhai High School, Champhai; Pu R. Vanlallawma, Headmaster, Govt. Middle School, Mission Vengthlang leh Pi R. Lalthangluaii, Headmistress, Govt. Primary School-I, Zotlang, Lunglei te an ni.
