NLUP 3rd & 4th Phase chu Lunglei District-ah sem tan a ni a, vawiin khan Lunglei Saikuti Hall-ah Khuallian Mizoram Chief Minister Pu Lal Thanhawla’n chhungkaw 18 hnenah tanpuina sum hi a hlan a ni. NLUP hnuaiah vek mi 13 hnenah Autorickshaw sem a nih bakah Chief Minister’s Special Assistance hmangin mi harsa zual bik 16 hnenah chhumchhia chhawmdawlna a sem bawk a ni. Vawiin inkhawmah hian UD&PA Minister Pu Zodintluanga, LAD Minister Pu P.C.Lalthanliana, AH&Vety. Minister Pu Nihar Kanti Chakma, Parliamentary Secretary Pu S.Laldingliana leh Lunglei High Powered Committee Vice-Chairman Pu Joseph Lalhimpuia te chuan Khualzahawm chan changin he hun hi an hmanpui bawk a ni.
NLUP semna inkhawm Lunglei DC Pu V.Sapchhunga kaihhruaiah Khuallian Pu Lal Thanhawla chuan thu sawiin NLUP chuan mihausa leh milian a zawng lova, mi harsa leh rethei, chhanchhuah ngaite, Zoram dung leh vanga awm kuthnathawktute, chhuamchhiate lamin a zawng zawk a ni, a ti. Sorkar laipui pawhin NLUP chu tha a tih em avangin tanpuina cheng vaibelchhe 2800 bakah RKVY hnuaiah pawh cheng vaibelchhe 200 a rawn pek belh thu sawiin Chief Minister chuan NLUP chu mi harsa zawkte chhawmdawlna a nih avangin he scheme hian Pathian malsawmna a dawng a ni, a ti bawk. NLUP dawngtu thahnemngai tak takte tan hlawhtlinna tha zawk an neih theih nan ‘Agriculture Credit Scheme’ leh NLUP kaihkawpa hmalak sak tum a nih thu a sawi a; hemi kaltlangin Bank atangin pung awm mang lova thlai chi hrang hrang chingtute tana loan lak dan tur ruahmanna ‘Kissan Credit Card’ siam sak an ni dawn a ni. Hei bakah hian NLUP leh sorkar scheme hrang hrang kalpui mekte chu thlunzawma, mipuite tan hlawk zawka kalpui tum a nih thu a sawi a. Rampumah Food Security Bill chu pawm a nih tak hnuah Prime Minister hlui Pu Rajiv Gandhi pianchampha phak August ni 20 atangin state zawng zawngah ruahman mek a nih thu a tarlang bawk.
Chief Minister chuan NLUP-in a tum - kuthnathawktute chawikan, ei leh bara intodelh bakah thing leh mau chereu mek humhalh leh tihpun, luihnar kang chat mek leh luipuia tui tlem zel te chhanchhuah hna - te chu khawvel pumin a ngaisangin a ngaihven mek a, khawvela mithiam rualte chuan Mizoramin NLUP a kalpui dan rawn zirchiangin ram rethei dangahte pawh hlawhtling taka kalpui a nih theih an ring a ni, a ti. Sorkar hmalakna avangin Lunglei District-ah ngei pawh hmasawnna hrang hrang hmuh tur a awm zel a, a bik takin thalaite khawvel mila ruahmanna hrang hrang zirna, infiamna leh IT lamah te pawh chak taka kalpui a nih mek thu a tarlang a ni. Khuallian Chief Minister chuan Lunglei District chhunga chhumchhia chhawmdawlna hmasa atan cheng nuai 20 chu vawiin inkhawmah khan Lunglei DC Pu V.Sapchhunga hnenah a hlan nghal nghe nghe a ni.
Vawiin NLUP semna inkhawmah hian UD&PA Minister Pu Zodintluanga pawhin thu sawiin Lunglei District huamchhungah sorkar hmalakna hrang hrangte tarlangin Lunglei-ah Liandala Mini Sports Complex hawn thar te, Convention Centre changtlung tak sak mek thu te, Shopping Centre leh Market sak tur te leh Serkawn-ah Stadium puitling sak tur te chu a tarlang a. LAD Minister Pu P.C.Lalthanliana chuan kawng hrang hrangah sorkar hmalakna chak tak avangin Mizo zawng zawngte tan khawvel thar a inhawng mek a, mipuite pawhin an chanvo dik tak an chang mek a ni, a ti.
Vawiin inkhawmah hian NLUP Implementing Board (NIB) Vice-Chairman Pu P.L.Thanga chuan NLUP hnuaia hmalak tawh te bakah sorkarin hma a lak tum zel dan chipchiar takin mipui kalkhawmte a hrilh a. NIB Project Co-ordinator Dr.Robert Rualthankhuma chuan chhumchhiate chhawmdawlna ‘Chief Minister’s NLUP Special Scheme’ sawizauna hun a hmang bawk a ni.
NLUP 3rd & 4th Phase semna inkhawm zawhah Saikuti Hall kawt atangin Khuallian Pu Lal Thanhawla chuan vawiina NLUP hnuaia Autorickshaw dawng 13 te chu a vailiam (flag-off) a ni.
Vawiin vek khan chawhnu dar 3:00-ah Chief Minister Pu Lal Thanhawla chuan Lunglei High-Powered Committee Office, Chanmari leh Liandala Mini Sports Complex, Farm Veng te chu a hawng nghal a ni. Chief Minister hi Minister te - Pu Zodintluanga leh Pu P.C.Lalthanliana, Parliamentary Secretary Pu S.Laldingliana, HPC Vice-Chairman Pu Joseph Lalhimpuia leh member te, Lunglei DC Pu V.Sapchhunga, Department hrang hrang aiawh officials te bakah a nupui Pi Lal Riliani, President, Indian Society on Health & Tobacco (Mizoram Chapter)-ten an tawiawm a ni.
