Tukin zing dar 10 :00 AM khan Chief Minister Pu Lal Thanhawla leh Home Minister Pu R. Lalzirliana hovin September ni 22-a Lunglei District & Sessions Judge Court leh Judicial Quarters ah thil duhawm lo tak thleng leh heng building misual ten an khawih chhiat chungchang ngaihtuahin emergent meeting neih a ni a. Meeting ah hian Chief Secretary Pu Lalmalsawma; DGP Pu Thianghlima Pachuau; Principal Secretary to Chief Minister Pu Lalram Thanga; Principal Secretary Home Pi Renu Sharma; Law Secretary Pi Marli Vankung leh Addl. Home Secretary Pu Lalbiakzama te an tel a ni.

Meeting chuan he thil thleng ah hian DC Lunglei chu suspend nghal turin Home Ministry (Cadre Controlling Authority an nih angin) ah thlen nise an tia, he thil thleng chhui chiang turin Magisterial Inquiry din nghal chu remtiin Magisterial Inquiry la turin Aizawl DC Pu Kanan Gopinathan chu mawhphurna pek ni se an ti a, a report chu working day ni sarih (7) chhungin theuhlut turin an ti bawk. Lunglei Court leh Judicial Quarters te venhimna dinhmun enchian leh a tul dan anga venhima hi tih chak an rel a. Lunglei a Judical Officer (Judge) 3 leh Lawngtlai Judicial Officer(Judge) Lunglei a court nei thin te hnenah Personal Security Officer (PSO) te pek rel a ni a. Court building leh Quarters chhia te chu PWD in a repair hna kalpui nghal turin rel a ni a. He thila pawikhawitu mi 29 man tawh te chungthu chu khauh taka rel a nih theih nan a tul anga dan leh thupek kengkawhtu ten hma la se tiin an rel bawk.