Chief Minister Pu Lal Thanhawla chuan vawiin khan Lungleia Thuamluaia Muala phul lem -artificial turf- phah leh chumia High Power Committee (HPC) Lunglei District Football Cup inkhelh vawi 2-na tur a hawng.

Chief Minister chuan nikum, kum 2011 a HPC Cup vawi 1-na inkhelh hawn tuma Thuamluaia Mual hi artificial turf phah anih tur thu a sawi, tuna hawn theih ani ta chu lawmawm a tih thu a sawi a. Zanah pawh inkhel thei tura electric engsiam mek pawh peih thuai a ni ang a ti. Chief Minister chuan tun hun hi thalaite hun ani tiin, an thil tihna kawng reng rengah taimakna leh rinawmnate, dikna leh Pathian tihna nen hmang thin turin a chah a. Sports lamah chauh nilo, ei leh bara kan intodelh theihna tura hma la turte, sipaia tanah te leh competitive exam beihah te hma la turin a chah a. ‘Kan thalaite hi export quality ni turin sorkarin theihpatawp a chhuah chho reng a ni’ a ti.

Chief Minister chuan Lunglei district leh Lunglei khawpui ngei hian hmasawnna nasa tak a hmuh chhan hi a enkawltu HPC hotute leh MLA dang ten hmasawnna pawisa kal reng reng hi dik taka a kalna tura an hman thin vang a ni a ti a. Mizoram hi tutemah duhsak bik awm lovin rualkhai thei ang bera hmasawnna kalpui a ni a ti.

Artificial turf phah thar Thuamluaia Mual chu neitu rilru puchunga dim tak leh duat taka hmang thinturin thalaite chu Chief Minister hian a chah a ni.

Khualzahawm Pu Zodintluanga, Minister for Sports pawhin thu sawiin, Lunglei hmasawnna tura Chief Minister hmalakna tam takah lawmthu a sawi a. Chief Minister hmalakna avanga mipuiin duhsak bik anga an hriat rualin, a sorkar hian ram pum tan hmasawnna ruhrel a siam vek a ni a ti.

Thuamluaia artificial turf phah tak hi ni 2 September 2011 ah bul tanin ni 24 February 2012 khan peih a ni a. A hna hi Great Sports Infra, Kolkata in Rs.397.523 lakhs senga an siam a ni a. A dung  hi 105 metres leh a vang hi 70 metres a ni.

HPC CUP vawi 2-na hawn tak hi thla khat chhung, ni 17.3.2012 atanga ni 19.4.2012 thleng awh tur, Lunglei District chhunga inter village council football tournament a ni a, team 82 an lut a ni.Vawiin hawnna a inkhel hmasa ber te hi Pangzawl VC team leh Lunglawn VC team te an ni.

Hawnna inkhawmah hi Pu V.Sapchhunga, DC, Lunglei in a kaihruai a. Chief Minister nupui Pi Lal Riliani bakah Pu NK Chakma, Minister of State for AH&Vety, Pu Joseph Lalhimpuia, Vice Chairman, HPC leh Pu S.Laldingliana, Parliamentary Secretary te an tel a ni.