Vawiin khan Mizoram University Convocation vawi 7-na neih a ni a, he University hnuaia degree hrang hrang - Graduate, Post Graduate, M.Phil. leh Ph.D. - te chu Khuallian National Research Professor Prof. Goverdhan Mehta, FNA, FRS in a hlan a. MZU 7th Convocation-ah hian Mizoram Education Minister Pu Lalsawta chu Khual Zahawm niin Finance Minister Pu H. Liansailova pawhin he hun hi a hmanpui ve a ni.

Mizoram University hian Convocation a neih thin ah hian ramchhung mi langsar leh pawimawh tak tak Khuallian atan a nei thin a. Tun tuma Khuallian National Research Professor Prof. Goverdhan Mehta hi National SAcademic Accreditation Council (NAAC) Chairman, Scientific Advisory Committee to the Prime Minister of India-ah member a nih bakah Fellow of the Royal Society of London leh Fellow of the Indian Scientific Academy a ni mek bawk a ni.

Khuallian Prof. Goverdhan Mehta chuan kum 2001 atang chauha din Mizoram University chu hun reilote chhungin zirna lamah hmingthanna leh hlawhtlinna engemawzat a nei thei chu a lawmawm hle a ni, a ti a. India rama mi chengte zinga zaa 54% hi kum 30 hnuai lam nia chhut a nih avangin khawvel ramte zingah hmathlir thui tak leh hunhma eng ber neite zing ami nia ngaih a ni a. Hetiang a nih avangin kan rama zirna sang zawk hi uluk taka ennawn a, tunlai khawvelin a mamawh mila kan zirna leh thiamna te pawh her dik a pawimawh tak zet tawh a ni, a ti bawk. Kum tin India ramah Graduate maktaduai 4 velin an pung zel a, heng zinga zaa 10% chauh hi hnathawka chhawr tlak leh eizawnna tana hmantlakah ngaih a ni thung a. Kan zirna in-a a thu a kan zirchhuah leh eizawnna kawnga kan chhawr tangkai tak tak tur thiamna te chu inperhsan ta hle a hriat a ni a, chuvangin kan zirna in zawng zawngte hian zirlaibu atanga hriatna chauh ni lo, zirlaibu pawn lama zirlaiten eizawnna atana an hman theih tur thiamna (skill development) lam hawi zawnga zirna kalpui a sawt zawk thu a sawi a ni. Mizoram University chu hun lo kal zelah zirna mai bakah Research lamah tan la zel tur leh mithiam leh miril tam zawk chher chhuak tura a duhsakna a hlan bawk a ni.

Khual Zahawm Education Minister chuan Mizoram chu sum leh pai dinhmunah a hniam a, industry lian din pawh a harsa hle a, amaherawhchu khawvel hriata kan inphochhuah theihna kawng awm pakhat chu zirna hi a ni tih hriain state sorkar pawhin theihtawp a chhuah mek zel a ni, a ti. Mizorama Elementary leh Secondary level-a zirna kalpui a nih dan hi thlak danglam a ngaih thu sawilangin Minister chuan zirlaibute ennawn a nih mek thu leh thiamna tak tak nei tura naupang leh thalaite chher chho tum a nih thu a sawi a ni.

Vawiina Convocation kaihruaitu MZU Vice-Chancellor Prof. R. Lalthantluanga chuan kum 10 chhunga University hmalakna leh hmachhawp awm te a tarlang a. Tun dinhmunah zirna discipline hrang hrangah zirlai an inthlau hle a, Science-ah 10% aia hniam leh Commerce lamah phei chuan lut an tlem leh zual thu a sawi a. Vice-Chancellor hian khawvel hi science & technology leh sumdawnna lamah chak taka kal mek a nih avangin zirna kan um zel danah pawh Mizote hian kan duhthlanna leh kan tuina te pawh tunlai khawvel milin kan her rem a tul tawh hle a ni, a ti. MZU hmachhawpah Electrical leh Computer Engineering, Bio-technology leh Medical College din pawh a tel thu a sawilang bawk.

7th MZU Convocation-ah hian a vaiin mi 2482  hnenah degree hrang hrang hlan a ni a. Heng zingah Gold Medal dawng mi 33 leh Book Prize lawmman dawng mi 16 an awm bawk a ni.