Telecom Regulatory Authority of India (TRAI) leh Mizoram Consumer Union te tangkawp chuan vawiin khan Aijal Club ah telecom hnuaia service provider leh consumer ten harsatna an neih te sawihona an nei. He hun hi Pu C Lalhmachhuana, Secretary, Information & Communication Technology chuan khuallian niin a hmanpui.

Khuallian Pu Lalhmachhuana kum 2004 a Mobile service mumal a luh hnuah Mizoram mipui za zela 85 in Mobile service an hmang tawh tih a sawi a, khawvel changkanna thang zelah Telecom atana ruhrel pawimawh Internet tha piah lamah Data lak leh inpekchhawnna a sang chho zel tih sawiin hemi atan hian Optic Fibre Cable (OFC) hmanga inthlunzawmna hna chu kalpui mek a ni tiin Mizorama OFC phum hna chu tlang chhengchhia leh lungchang tamna karah hna a harsat avangin kalpui chak hleihtheih anih loh thu a sawi a, hemi avang hian Railtel Corporation of India in he hna a kalpui mek hi ram leilung leh dinhmun a zira herrem thiam a tul thu leh boruak lama kal turin siam a that zawk arin thu a sawi a ni.

Pu Lalhmachhuana chuan Mizorama Child helpline siam mek Number 1098 chu Service provider thenkhat ten an la kalpui loh avangin hman theiha kalpui turin Service Provider ten tan la thuai se a duhthu a sawi. Telecom Regulatory Authority of India chuan Cable TV operator ten kumin chhunga set up box hmanga in tina Cable Network Digital Media hmanga pek tura a tih chuan connection diklo leh felhlel a la tute tan a hrilhhriat tir zel tawh tur thu leh hemi bakah hian Local Cable ten duh duha channel himlo leh Programme thalo an tihchhuah thin chu endikna hnuaiah a awmtir tur thu a sawi bawk a ni.

Inkhawm hi Dr. Chawngsailova, General Secretary, Mizoram Consumer Union (MCU) in a kaihruai a, Prof Thanglura, President, MCU in Mizoram ah telecom chungchang a harsatna tawhte sawina hun a hmang a. Pu Rabin Sarkar, Senior Research Officer, TRAI, Kolkata chuan hetiang Consumer Outreach Programme hi India rampum ah neih anih thu te sawiin TRAI in tunhnai a consumer te tan an hmalakna hrang hrang a sawi. Pi R. Paul Choudhury, Adviser, TRAI, Kolkata chuan TRAI chungchang inhrilhhriatna hun a hmang. Vawiin inkhawm ah hian service provider, Aircel, Airtel, BSNL, Vodafone leh Reliance leh Consumer club hrang hrang member te an tel a ni.