Rampum huap intihsiakna National Level Science Seminar-a Mizoram aiawha tel tur thlanna, intihsiakna ni bawk State Level Science Seminar chu vawiin khan Chanmari YMA Hall-ah neih a ni a, School Education Minister Pu H Rohluna chu khuallian niin Seminar hi a hmanpui. State Level Science Seminar hi SCERT hnuaia Science Promotion Wing buatsaih niin tun tum hi a vawi 34-na a, kumin a State Level Science Seminar thupui chu ‘Innovations in Agriculture for a Sustainable Future : Prospects & Challenges’ tih a ni.
Pu H.Rohluna chuan Seminar thupui chu tunlai khawvel khawsak phung nen a in milh thusawiin thiamna sang chho zel khawvelah hna in min daih dawn lova chuvangin awmze nei zawka tunlai thiamna hmang a lehkhathiam ten loneih lam an tui pui a, an thawh chuan hlawhtlinna bakah intodelhna nasa takin a thleng thei a ni a ti. Zirlai naupangten science lam hawi leh activities dang ah te an inhman tam chuan an mahni ah rintawkna a pe a, an mahni tan chona a siam a, chu chuan nakina zelah an thil tih apianga hlawhtlin ngei tumna an rilru a tuh theih thu a sawi bawk.
Mizoramin Science zirna lam, a bik takin technical lam, doctor leh engineer lamah kan intodelh chho mek a mahse Science zirtirtu lamah kan la indaih lo hle a, chuvangin zirtirtu lak dan Recruitment Rules chu siam danglam a, Science leh Mathematics zirtirtute tan engemaw chen hna hauh sakna ruahmanna chu Sawrkarin a ngaituah mek a ni, a ti Pu H Rohluna chuan.
School tan hma chungchang sawiin Minister chuan he ruahmanna hi khaw eng hman tangkai theihna tur nia a hriat thu leh hmasawn zawnga kan kal theihna tur kawnga tha tak nia a ngaih thusawiin hemi chungchang hi uluk taka zir tur leh thlir turin Department chuan Committee a din a, thutlukna erawh Sawrkarin a la siam lo a ni, a ti. Naupangte zirna kawngah zirtirtute bakah nu leh paten mawhphurhna sang tak an nei a, an fate zirna chu zirtirtute kuta dah mai duh tawk lovin an zirna ngaihsak a theihtawp chhuah turin nu leh pate a chah a ni.
He programme hi Pi Malsawmthangi, Director, SCERT chuan kaihruaiin Pi Sangthanmawii, Joint Director, SCERT chuan Seminar kalpui a lo ni tawh dan te leh Seminar in a tum te a sawi. He Seminar ah hian District Level a titha zirlai 13 te chuan Seminar thupui sawiin inelna an nei a, Written Test an neih bakah a endiktute (Judge) zawhna an chhang tel bawk a ni. St.Paul’s HSS zirlai Amelyne VL Rosangzuali chuan lawmman pakhatna a la; Lalhriatsanga St. Francis of Assissi Schoo, Mamit leh T. Lalhlimpuii, St. John’s HSS Kolasib te chuan lawmman pahnihna leh pathumna an la a ni.
Sikul sawmhnih chuang atangin zirlai thahnem takin Seminar hi an zirtirtute hovin an chhim a. Seminar hi kum tin National Council of Science Museum (NCSM) leh Birla Industrial & Technological Museum (BITM) Kolkata te tangkawp chuan an buaipui thin a ni. State Level Seminar a pakhatna hian October ni 11, 2014 a Vishveswariya Industrial & Technological Museum, Banglaore a National Student’s Science Seminar-ah Mizoram ai a awh ang. Hun kalta khan Mizoram aiawhte chuan National Level a vawihnih lai lawmman an la tawh a ni.
