NLUP Implementing Board Chairman Pu J.H. Rothuama chuan zankhat riakin Serchhip District a tlawh a, vawiin chawhnu khan Serchhip DC Meeting Room-ah NLUP Line Department Officialte leh Serchhip District MJA member te kawmin NLUP hmalakna te an thlirho a, hei bakah hian NLUP Serchhip District chhunga hlawhtling lehzuala kalpui dan tur te a sawipui a ni.

Pu J.H Rothuama chuan Serchhip District Line Department hotute chu NLUP hmalakna kawnga an hnathawh ah fakin beneficiaryte hmalakna vil kawngah pawh Line Department te leh VC ten hma an la tha hle a ni a ti a, Mizoram hmun hrang hrangah NLUP dawngtu tam tak an inthlahdah avangin he Project hlawhtlinna atan hian NLUP chu khauh zawka kalpui tum a ni a ; hemi kawngah hian Line Department te pawhin beneficiary te vil leh endik kawngah nasa zawka tan an lak a tul dawn thu a sawi a, ei leh bara intodelhna kawngah Serchhip tlangdungah hian hmalak theihna tur remchang tam tak a awm a, NLUP 2nd Phase kalpui leh mekah hian he project hi mipui innghahna ani tih hre renga mizo tlawmngaihna rilru pu chunga theihtawp chhuah turin Line Department te chu a chah a ni.

He meeting-ah hian Pu K. Lianzuala, MKVI Board Chairman pawhin thu sawiin NLUP chu Mizoram sawrkar project kal lai a ni a, Sawrkar Laipui inthlak danglam avanga he Policy hi danglam tur ani chuang lo a ti a, a hlawhtlinna kawngah a dawngtute leh Project enkawltu ten mawhphurhna an intawm ani ti in NLUP thil tum leh a pawimawhna te hi beneficiary te hnenah nasa lehzuala zirtir ala pawimawh reng a ni tiin a tithalo deuh te pawh dawhthei taka enkawl a khaichhuah hram tum turin Line Department te chu a chah bawk a ni. He meeting ah hian Line Department hrang hrangte chuan NLUP kalpui zelna tura hriatfiah loh an neih te leh harsatna chi hrang hrang an neih te NIB Chairman hnenah hian thlenin a sutkian dan tura ruahmanna siam dan tur te an sawiho a ni.

Line Department te nen an inkawmho hnu hian Serchhip District MJA member te nen inkawmhona hun an hmang leh a, MJA ten NLUP kalpui dana hriatchian an duh te zawtin Serchhip District chhunga NLUP kalpui dan chungchanga rawtna an neih te an thlen a; Serchhip MJA te chuan NLUP chu Party mal policy ni tawh lova Sawrkar policy anih tawh avangin a hlawhtlin theihnan theihtawpa Sawrkar thlawp an tum thu leh hemi chungchang hi kum 2011 khan resolution an lo passed tawh thu an sawi a, NIB Chairman pawhin Media ten NLUP an tuipui chu lawmawm a tih thu leh thawhhona tha tak nen hmalam an pan ho zel a beisei thu a sawi a ni.

Vawiin meeting hi Serchhip District Bawrhsap Pi Juhi Mukherjee, IAS chuan kaihruaiin Serchhip District in NLUP hlawhtlin nan theihtawp an chhuah thu te a sawi a, NIB Chairman leh hotu lian dang ten Serchhip District an tlawh chu lawmawm a tih thu a sawi a ni.

NIB Chairman chuan Serchhip an panna kawngah hian Baktawng Tlangnuam tlawhin Aloe-Vera hmanga sahbawn siamna hmun tlawhin NLUP atanga helai hmunhma tihchangtlun dan tur te a enpui a, hei bakah hian NLUP hnuaia Carpentry leh bel chhunga eizawng ten hma an lak dan a enfiah nghal bawk a ni.

NIB Chairman hi zanin ah Thenzawl ah a riak ang a, naktuk ah Thenzawla NLUP hmalakna hmun hrang hrangte a tlawh dawn bawk a ni.

NIB Chairman hi Pu K.Lianzuala, Chairman MKVI, Pu James Lalrinchhana, MCS, Secretary, NIB, Pu David L. Thangliana, MIS, Chief Media Officer, NIB, Pi PB Lianthangpuii,MIS, Media Officer, NIB leh MJA General Headquarters atangin chanchinbu engemawzatin an tawiawm a ni.