Vawiin hian Lawngtlai District Bawrhsap Pu J. Hmingthanmawia chuan ram chhunga District dangte rualin Lawngtlai DC Conference Hall ah Pradhan Mantri Jan Dhan Yojana chu a hawng.

Kumin Independence Day a India ram Prime Minister, Pu Narendra Damodardas Modi an a lo puan lawk tawh angin vawiin hian India ram pumah Pradhan Mantri Jan Dhan Yojana (Prime Minister Financial Inclusion Programme) chu a ruala hawnna neih a ni a, he hunah hian ramchhunga District tinah District Bawrhsap hova hawnna hun neih a ni a, Lawngtlai ah pawh vawiin chawhnu dar 3:30 PM khan hawnna hun neih niin Bank Account nei thar mi 36 te hnenah Pass Book hlanna neih a ni a, Prime Minister thusawi live-a thlirho a ni bawk.

Vawiin a Central Programe thar hawnna inkhawm hi Lawngtlai a Bank lian ber State Bank of India kaihhruaina hnuaia neih a ni a, SBI Lawngtlai Branch Chief Manager Pu Luaihnuna Guite in inkhawm hi kaihruaiin Pu Aldrin Lalngaihawma’n PMJDY chungchanga mipuite hriattur pawimawh a sawi fiah a ni.

Pradhan Mantri Jan Dhan Yojana hi ramchhunga chhungkaw tin atanga mi pakhat talin Bank Account an neih vek na tur ruahmanna a ni a, he ruahmanna hi Biometric Enrollment (ADHAAR) nena kal kawp tura ruahman a ni a, a nih dan tur ang taka kalpui tur chuan ADHAAR leh Internet Service tha tak neih a ngai hmasa dawn niin sawi a ni. He Programe hi ram chhunga Bank zawng zawngte nena thawk hova kalpui tur a ni a, Mizorama a kalpui dan tur pawh ruahmanna siamfel tawh niin thingtlang lam tan Sub- Service Area (SSA) leh khawpui lam tan Urban Ward Area (UWA) ti a then a nih bakah State Level leh District Level Committee din fel tawh a ni bawk.

He programme hi Phase 2 ah then niin Phase I hian 15th August 2014 – 14th Aug. 2015 a huam anga Phase II hian 15th August 2015 – 14th August 2018 thleng a huam dawn a, hemi chhung hian India ram pum tuamchhuah hman beisei a ni.

Vawiin a a hawnna inkhawm ah hian Lawngtlai a Bank hrang hrang atang te, State leh LADC Department atang te, tlawmngaipawl leh chanchinbu mi bakah zirlai naupang eng emawzat an tel a ni.

Attachment

  • Loading attachment...