Kan Mission Field tur chu zirlaite an ni. He thu hi vawiina Pu Joseph Lalhimpuia, Parliamentary Secretary in District Institute of Education & Training (DIET) Aizawl Annual Sports 2014 kharna programme Lammuala a hmanpuinaa a sawi a ni.

Pu Joseph Lalhimpuia chuan Education Department leh zirtirtute hian zirlai te hi kan Mission Field anih tih kan hriat nawn a ngai a ni, tiin hemi atan hian DIET trainees, zirtir hna thawk sa leh nakin lawka zirtirtu ni tur te chuan kawng hrang hranga zirna rawngbawlna an hlenchhuah kawngah he rilru pu hian inbuatsaih thin se tiin a duh thu a sawi. Sawrkar chuan zirna tha a ngaihpawimawh avangin Teacher Eligibility Test (TET) paltlang lo leh DIET trained ni lo te tan zirtir hna a thawh theih tawh loh tur thu sawiin, RMSA leh SSA hnuaia thawk zirtirtu 1579 te chuan Mizorama DIET hrang hrangah leh IGNOU ah te training an bei mek a, hei hi zirna tha kan neih theihna kawnga rahbi pawimawh tak a ni dawn a ni, a ti.

Parliamentary Secretary chuan zirlai te tan taksa insawizawi na (physical fitness), faina, thianghlimna leh hriselna pawimawhna te hriain Sawrkar chuan Physical Movement Mizoram pum huap sikul ah te kalpui a tum thu sawiin, hemi atan hian inbuatsaih mek a ni a, School Education Department hnuaia awm Physical Wing chu tangkai zawka hman tum a ni, a ti.

Sawrkar chuan zirna a ngaihpawimawh takzet avangin sum leh pai harsatna tam tak karah pawh SCERT a post 99 hnawhkhahna atan te, Higher Secondary School a contract lecturer hna 34 lakna tur atan te leh Middle School leh Primary School a post 400 chuang lak phalsakna atante Sawrkar chuan remtihna a pe a, heng hna lak thuai anih theih nan hriattirna te pawh chhuah tawh anih thu a sawi.

DIET Aizawl Annual Sports kharna programme hi SCERT Director Pi Malsawmthangi’n kaihruaiin DIET Principal-in thu a sawi bawk. DIET Aizawl hi kum 1953 khan din niin kumin hian Trainees 450 vel an awm mek a ni.