Vawiin tlai dar 4:00Pm khan SBI, Saiha Branch bul tumin DC’s Conference Hall-ah India ram hmundang te rualin Pradhan Mantri Jan Dhan Yojana( PMJDY) Scheme tlangzarhna hun hman a ni. He PMJDY tlangzarhna inkhawm hi Pu John L.T. Sanga, Addl.DC in a kaihhruaia, Pu RT Zachônô, CEM, MADC chu khuallian a ni.

Khuallian Pu RT. Zachônô chuan sawrkar laipui atanga hetianga mirethei leh harsa zawkte tana Bank kal tlanga hamthatna a siam hi India ram tan hmasawnna rahbi thar a ni a. Mi hausa leh retheite inkar zau lutuk pawh he scheme hian nasa takin a ti zim dawn a ni, a ti bawk.

He PMJDY scheme hnuaiah hian mirethei leh hnuaihnung zawkte, Bank account la nei lo te leh Bank hamthatna hmu ve pha lo ten Bank an hman tangkai thei nan a thlawnin sawrkarin account hawn sak dawn a ni. He account holder te chuan accident insurance cheng nuai 1 thleng an claim thei dawn bakah, Ru-Pay Scheme nen thlunzawmin Debit card siam sak an ni bawk ang. He Scheme hi phases hniha then a ni. 1st phase hian August, 2014-August, 2015, chhung a awh ang a, 2nd Phase hian 2015-August, 2018 thleng a awh ve thung ang. Thing tlang leh khawpuia mirethei Bank account la nei lo chhungkaw thlan bik Vbc 7.5 hnena Kum 4 chhung (August,2014- August 2018) hian account 2 theuh hawn sak tum a ni.

Vawiin PMJDY Tlangzarhna ni-ah hian Khawpui leh Thingtlanga mi bank account nei lo chhungkaw Vbc 1 hnenah Account hawn sak nghal tum a ni a. Public Sector Bank te chuan india ram hmun hrang hrang, hmun 60,000 aia tlem lo va, PMJDY chungchang inzirtirna camp pawh buatsaih tum a ni bawk. Prime Minister Narendra Modi chuan PMJDY chungchangah hian Bank officer mi Nuai 7.5 hnenah e-mail a lo thawn vek tawh bawk a ni.

Bank tin te chu Sawrkar laipui atangin Account nei lo chhungkua Account an hawn sak tur zat bi tuk sak vek an ni a. SBI,Saiha Branch pawh chhungkaw 125 tan account hawn sak tur a tuk an ni a, mahse tunah hian chhungkaw 55 tan Account an la hawnsak rih a ni. Chung an account hawnsak te chu vawiin PMJDY tlangzarhna hunah hian sem chhuah nghal a ni.

Vawiin PMJDY tlangzarhna inkhawmah hian Saiha District-a Bank hrang hrang hotute, Head of office-te leh sawmbik te an tel kim hle.