Vawiin chawhnu dar 4:00 khan India ram hmun dante rualin Kolasib DC Cofenrence Hall-ah Pradhan Mantri Jan Dhan Yajona (PMJDY) hman tanna inkhawm neih a ni.

Kolasib DC Pu Jitender Yadav chuan, 'PMJDY hnuaiah chhungkaw tin te chu bank account neihtir vek an ni dawn a; sawrkar atanga an pawisa dawn tur apiangte direct-in an account-ah a luh zel thin dawn avangin mirethei zawkten sum an khawl theih phah dawn a, sum khawl pawimawhzia inzirtirna tha tak a ni tel nghal dawn a ni' a ti. Bank account hawnna atana state dangten Adaar Card an hman ang chu Mizoram-ah mipuiin an la neih kim loh avangin lehkha pawimawh dangte hmangin account hi hawn theih a nih tur thu DC chuan a sawi a; Bilkhawthlir khuaa PMJDY hnuaia State Bank of India-in bank account an hawnsak, mi 90 te hnenah passbook a hlan nghal bawk.

PMJDY hnuaiah hian chhungkua zawng zawng te chu bank account neihtir vek tura ruahman a ni a, pawisa dah tur nei miah lo tan pawh account hi hawn theih a ni. He ruahmanna hnuaiah hian account hawnsak tura in tina lut lawr tur an awm dawn a, heng mite hi hriat hran an nih theih nan uniform fel takin an inthuam vek dawn a ni. Account neitute chu RUPAY Debit Card (ATM Card) pek vek an ni dawn a, loneitute bik erawh chu RuPay Kissan Debot Card pek an ni ang. PMJDY hian vanduaina avanga account neitu a thihin insurance cheng nuai khat a ken tel bakah, bank atanga loan lakna remchang a keng tel a ni. District tina khua zawng zawng leh chenna in awm zat chhinchhiah fel vek a ni a, area pakhat hian chhungkaw 1000 atanga 1500 a huam zel dawn a, March 2016-ah chuan km 5 dan zelah bank awm zel tura ruahman a ni. District level-ah PMJDY kalpui dan vil turin DC chairman-na hnuaiah committee din vek a ni ang.

Vawiina PMJDY hman tanna inkhawm, Kolasib-a neihah hian SBI, Canara Bank, NABARD leh Mizoram Rural Bank Manager-te an tel a, inkhawm hi SBI chief manager Pu RK Brahma chuan a kaihruai a ni.