Vawiin tlai dar 4:40 khan rampum huap tur ‘Pradhan Mantri Jan Dhan Yojana (PMJDY)’ chu New Delhi-ah Prime Minister Pu Narendra Modi-in a tlangzarh ta a, hemi rual hian ramchhung State leh District zawng zawngah PMJDY hawnna neih nghal a ni. Lunglei-ah pawh State Bank of India, Lunglei Branch huaihawtin YMA Sub-Hqrs. Conference Hall-ah PMJDY hawnna neih a ni a, he hunah hian Lunglei Addl. DC Pu Lalhmachhuana chu Khuallian niin he PMJDY hnauaia SBI Account hawnsak tharte hnenah Account Book leh Rupay Card a sem nghal a ni. New Delhi-a he Scheme thar hawnna inkhawm pawh DDK News-ah Live-in thlirho a ni nghe nghe.

PMJDY hawnna inkhawm Pu James L. Pachuau, CM Lead Bank, Lunglei kaihhruaiah Addl. DC Pu Lalhmachhuana chuan sorkar laipuiin rampum huapa hetiang scheme tha tak a duan chhuah tak chu mipuite tan nihlawhna ni a ni, a ti. Ram thanchho zelna tura rahbi pawiawh tak a nih ngei a rin thu sawiin Pu Lalhmachhuana chuan mipui mimirte tan sum leh paia an dinhmun tihnghehna tur a, mi harsa zawk ten leirem an rah ve theihna tur a nih avangin Bank hrang hrang leh mipuite inkarah thawhhona tha awm zel a pawimawh a ni, a ti a. Bank-ten a tul ang zela mipuite finchhuah zel a, inzirtir leh inhrilhhriat zel turin a chah a. Sorkar hmalakna pawiawh tak hi a hlawhtlinna turin thahnemngai takin i bei theuh ang u tiin kalkhawm zawng zawngte a sawm a ni.

Kumin Independence Day 2014 khan Prime Minister-in a puan tawh angin chhungkua tin atan ‘Prime Minister Jan Dan Yojana’ hi ruahman a ni dawn a. PMJDY-in a tum ber chu rampuma bank account la nei ve lo chhungkua tinah mi pahnih talin account pakhat theuh an neih ve a, bank dawr ve thei a, bank atanga hamthatna hrang hrang an chan ve theihna tur a ni. Mipui mimir ten sum leh pai khawvel an rawn hmelhriat a, hamthatna chi hrang hrang - bank loan, insurance, etc - an hmang tangkai theih tawh dawn a ni.

World Bank Findex Survey (2012)-in a tarlan danin thla 12 kalta chhung khan India a mihring cheng zawng zawng (population) zingah 100 zelah 35% chauhin bank account an nei a, za zelah 18% chauhin bank pawisa an puk a ni. He dinhun hian Financial Inclusion Programme hi chak zawka nawr kal a tulzia a ti lang chiang hle a, hemi tihlawhtling tur hian sorkar chuan PMJDY kaltlangin hma a rawn la ta a ni.

He PMJDY Programme tihlawhtling tur hian sorkar laipui atanga vil (monitor) reng a ni ang a, mawhphurhtu Bank leh Insurance Company te bakah Central, State leh District sorkar officials thlengin an hmalakna leh an thlen chin chhui zui zel a, record thlap a ni dawn a ni.

Attachment

  • Loading attachment...