Pu K Lalnghinglova Education Commisionner leh Secretary chuan Education Deptt . chuan Code of Ethics a tichhuak dawn, a. Hei hi mizorama zirna lama thawktute leh zirlaite nasa takin a siamthatu tur a ni dawn a ni, a ti.

He thu hi vawiina Education Deptt buatsaih ‘Education Campaign for Teachers, VEC, SMDC leh SMC te puala Awithangpa Hall Kawnpui-a a sawi a ni a. Code of Ethics ah chuan Zirtirtu Zu leh ruihtheih thila fihlim lo te hremna Dan leh Meizial Zu laka thununna tur leh Zirlai naupang Kuhva leh Meizial lei tura tirh khapna Dan a tel ang a ti a. Hei bakah hian Education Deptt chuan Zirtirtute zawm tur Dress Code a tichhuak dawn bawk a, kar khat ah Zirtirtu hmeichhia chuan ni 2 (hnih) tal Puan an bih tur a ni a; hmeichhia te incheina chu Zirlai naupang te mit la khawpa maksak a ni tur a ni lo tiin Mipa te pawh T Shirt ha leh Chapal bun chunga School kal phal a ni dawn lo a ti a ni.

He Campaign hi Pu B Lianthlira DEO Kolasib in a kaihruai a. Pu K Lalnghinglova chuan Zirna School-a Zirtirtu indaih loh zual bikna School-a dah turin Zirtirtu thawklai te siamrual rawtna kalmek chu tun hnaiah a thawh khatna turin hmalak a ni dawn a ti bawk. Zirtirtu siam rual sawi rik hian mi thenkhat chuan Politician leh Officer te kaltlangin an awmna sawn an dil thin a, hei hi sawrkar chuan a duh lo a ni a ti.

Vawiina Campaign ah hian khaw 15 huam chhunga Zirtirtu leh School Committee hrang hranga tel khawtlang hruaitute an kalkhawm a; Pi K Lalsiamliani SDEO Kawnpui leh Pu Lalrammawia Kawlni DPC SSA Mission Kolasib ten thu an sawi bawk.

Education Campaign hi Zoram hmun hrang hrang ah neih tur a ni a; vawiina neih hi a hmasa ber a hawnna a ni a; Naktuk ah Kolasib ah neih leh a ni ang.