Vawiin khan Information and Communication Technology (ICT) Minister Pu Zodintluanga chuan ‘e-Governance with focus on its intervention in office management’ training, Under Secretary chin chunglam te tana buatsaih chu Aijal Club-ah a hawng.

Pu Zodintluanga chuan Mizorama chhungkaw tin deuh thawin television kan nei thup ang hian hun reilote chhungin computer kan nei ta fur a, sorkar pisa-ah pawh typewriter hluihlawnin computer hian a luahlan zo ta vek a; computer tel lovin hna a thawh hleitheih ta meuh lova, department thenkhatah phei chuan sorkar laipui nena indawrnaah internet kal tlang ngei ngei a tul tawh a ni, a ti a. Awlsam leh chak zawka hna thawh theihna Information Technology kaltlangin sorkar office-ah lehkhapuan hmanglo (paperless) office siam thuai hi sorkar chuan a thlir a ni tih sawiin ICT Minister chuan a hlawhtlin theihna turin a taka hmangtu tur sorkar officer leh thawktu dang te an pawimawh takzet a ni, a ti. Minister chuan technology a than chak ang zelin a ruala kal ve tura sorkar hnathawk te an inzir zel a pawimawhzia sawiin department tin deuh thaw in website an neih tawh te hi ti thar (update) zel tur te, sorkar pisa a computer leh internet te pawh tangkai zawka hmang turin a chah a, anmahni tanpui turin ICT Department pawh a inpeih reng a ni, a ti. Pu Zodintluanga chuan hmasawna a awma thil inthlakthleng danglam awm thin chu huphurh lova tangkai taka hmang zawk turin sorkar officer te a chah a, vawiina training an neih pawh an hnathawhna kawnga awlsamna siamsaktu a nih ngei a beisei thu a sawi bawk a ni.

Information and Communication Technology Principal Informatics Officer Pu Lalthlamuana chuan an Department hmalakna leh hmachhawp te a tarlang a. Information technology hmanga inrelbawlna e-governance a hlawhtlin chuan sorkar tha leh chak, good governance kan tih hi kan nei thei dawn a ni, a ti a. Thingtlang leh khaw pilril zawk ami te pawhin sorkar atanga an mamawh leh duh te anmahni kawtkai maiah awlsam taka an hmuh theihna kawng a inhawng ang, a ti.

Training hi nilenga neih niin ICT Deputy Director Pu C. Lalrosanga’n a kaihruai a. Thupui thlan bik hmangin PIO Pu Lalthlamuana, System Integrator Pu C Vanlaldika leh System Administrator Pu Lalengzuala ten officer kalkhawm te hi an zirtir a ni.