Vawiin October 25, 2012 hian Pu H. Zothangliana. P.S., Tourism Department enkawltu Office Chamber-ah Committee thukhawm chuan, Thalfavang Kut hman hun atan Nov 30-1st December, 2012 nise, tiin a rel a. Thalfavang Kut hi kumtin November kar tawp bera hman nise tia lo rel tawh chu Central atanga sum hmuh tlai avangin hman hma theih a ni lova; mipui remchanna a nih beiseiin, Zirtawpni leh Inrinni a thlang ta a ni. He ni hnih awh tur hman theihna tur hian Tourism Department chuan Sorkar laipui atangin kum 2004 atang khan sum thahnem tak a hmu tawh a. Mizoram State sum hmang miah lova hetiang intihhlimna hun hmanna tur sum a hmu thin hi a lawmawmin, intihhahdama, boruak thawl taka hmang theuh thei turin mipuite lo inbuatsaih turin beisei an ni.

He hunah hian Stall thahnem tak siamin, lei tur te, eiho tur te thahnem tak awm tura beisei a ni. Mizorama Thlalatu Pawl te pawhin Stall hawngin, ‘Thlalak tam tak phochhuah a ni ang a, thla la duh tan laktir theih reng an ni bawk ang.

Intihhlimna chi hrang hrang leh zai leh music mawi tak tak ngaihthlak tur a awm ang a, Advance Krismas hawi pawha hman theih tur, hun hlimawm tak hman tum a ni.

He thalfavang Kut hi Hmuifang tlanga hman tum a ni a; Aizawl atanga km 50 leka hla, khawvel khualzin mitten an hmuh chak Mizoram mawi tak, ramngaw leh tlangsang boruak nuam tak tak hmuh theihna hmun ngeiah hmang tura buatsaih a ni dawn a ni.