Mizoram Legislative Assembly Deputy Speaker leh bialtu MLA ni bawk Pu John Rotluangliana chuan vawiin khan Lengpui Branch YMA-in an din champha phak 75-na (Platinum Jubilee) an Branch YMA Hall-a an lawmna chu a hmanpui a, Platinum Jubilee pual lungphun a hawng nghal a ni.

Jubilee pual thuchah sawiin Dy. Speaker chuan Lengpui khua chu khaw thang mek leh thang zel tur, Airport awmna khua, NIT leh Mini Sports Complex-te din tura sorkarin hma a lak mekna hmun a ni a; hmun dang atanga mi chi hrang hrang la fuan khawmna hmun tur, hnamdang ten Mizo ziarang an hmuh hmasak berna hmun a nih avangin thlaite leh mimir hrim hrim pawh inchei kawngahte, in leh a vel vawn fai leh nungchangah te fimkhur a, Mizo ze mawi tak lo lantir thin turin a chah a. YMA kum puan ‘Ram leh Hnam Humhalh’ chungchang sawiin ram leh hnam humhalh atana pawimawh em em chu ei leh bara intodelh hi a ni a, chumi tihlawhtling tur chuan taimakna a pawimawh a ni, a ti. Khawvel ram hrang hrangah thalaiten hna an thawh nasat zia leh mahni intodelh tura tan an lak nasatzia sawiin, mahni leh chhungkua intodelh ve theihna tura sorkarin hma a lak mekna NLUP chu a tihlawhtlingtu nih theuh tum turin leh nu leh pate kuta dah mai lova thalaite chu sulsutu nih tum turin a sawm a, mahni phak tawk kut hna thawh zak lo turin YMA member kalkhawmte chu a chah a ni. Khuallian hian Jubilee ruai senso phuhruk nan Rs.5000/- a thawh ve a ni.

Lengpui Branch YMA te chuan nimin atang khan Jubilee lawmna programme chi hrang hrang an hmang a, chung zingah chuan mamawhte tana thisen a thlawna pek niiin member 46 laiin thisen an pe a ni.