Vawiin khan Finance Minister Pu Lalsawta hovin Secretarriat Conference Hall-ah NEDP-EDS hnuaia Entrepreneurs thlanchhuahten Bank an dawrna lama harsatna an neih thin te leh Bank lam pawhin anmahni dawrtute hriat tura thil pawimawhte inhrilhhriatna hun hman a ni a. He Bankers-Entrepreneurs Meeting-ah hian Planning Secretary Dr.C.Vanlalramsanga, Finance Secretary Pu Sawihlira, Commerce & Industries Director Pu J.Hmingthanmawia, a kaihhnawih department official-te bakah Aizawl khawpui chhunga Bank hrang hrang aiawhte, Entrepreunership lama hnarkaitu MEDMOC hruaitute leh NEDP hnuaia Entrepreneurship Competition Winner-te an tel a ni.
Meeting kaihruaitu Finance Minister Pu Lalsawta chuan Mizoram sorkarin NEDP a kalpuinaah hian ‘entrepreneurship’ a chawilian ber a, kum khat leh a chanve kalta chhung khan entrepreneur-te tan inelna chi hrang hrang huaihawt a lo ni tawh bawk a; henga tithate chu sorkarin an bultan nana theihtawpa tanpui a inhuam reng thu a sawi a. Vawiina Banker-Entrepreneur meeting neih chhan ber pawh heng entrepreneur bultan turten bank an dawrnaah harsatna an tawh thinte chu Bank hotute nen hmaichhana sawiho theihna hun siamsak leh entrepreneur-te hriat tur thil pawimawh hrang hrang Bank lamin an hrilhfiahna hunah hman nise a duh thu a sawi bawk. Mizoram leilung leh a cheng mihringte enin NEDP chu hlawhtling ngei tura beisei a nih thu sawiin Finance Minister chuan vawiin thlenga state chhunga bank hrang hrang awmte hnathawh chu a fakawk takzet a, tanlakna tur erawh a la tam a ni, a ti. Investment tel lovin sumdawnna hlawhtling leh lian tham tak tak a awm thei lova, sumdawnna hlawhtling chuan hna (employment) a siam a, chu chuan sum leh pai dinhmun pawh a tisang zel thei a ni tiin Finance Minister chuan Bank lamin loan rulh tha duhlo an awm thin avanga loan pekchhuah an sak tlat chu a hriatthiamawm rual rualin, India Prime Minister ngei pawhin thalai zawkte mahni kea ding tum leh mahni eizawnnaa intodelh tumte chu theihtawpa tanpui an ngaih thu a sawi tawh a, harsatna chu awm thin mahse thawhhona tha nen chuan hmalakna eng pawh a hlawhtling thei a ni, a ti. Vawiin meeting-a an thurel leh hmalak dan tur an duanchhuahte chu Mizoram tan thil thar leh chhinchhiah tlak a nih ngei a rin thu a sawi bawk.
Planning Secretary Dr.C.Vanlalramsanga pawhin thu sawiin NEDP chu khawvela sorkar programme duanchhuahah chuan huamzau leh kim ber pawl a nih a rin thu a sawi a; he scheme hlawhtling tak tak tur erawh chuan bank lam nena thawhona a pawimawh hle a ni, a ti. Vawiin meeting-a bank aiawha lo tel zawng zawngte chu ‘Team Mizoram’ ah an tel vek a ni tih inhria a, theihtawp chhuahpui turin a sawm.
Vawiin meeting-ah hian NEDP-EDS ‘Mizoram Kailawn’ hnuai entrepreneur tithate chuan Bank-ah loan an dila harsatna an tawh hrang hrangte an sawichhuak chu Bank lam hotuten an lo hrilhfiah zel a. Sumdawnna liantham deuh atana bank atanga loan la duhte chu bank zawng zawngin an nhman tawm ‘Regional Self-Employment Training Institute’ (RETSI), Thuampui, Aizawl-ah training neih phawt se an duh thu leh loan rulhna tur nei thalote tan chuan loan pekchhuah a harsat thu bank lamin an sawi thung a. NEDP-EDS hnuaia scheme kalpui a nih dan leh entrepreneurship lama sorkarin hmalak a tum dante Bank lam pawhin an hriatthiam theih nan ‘Awareness programme’ neihpui a, entrepreneur bultan turte pawh financial awareness pek tam a pawimawh thu an sawi.
