Vawiin khan Assembly Annexe Conference Hall-ah Public Health Engineering Department (PHED) buatsaih ‘Smart Water Solutions Conference’ neih a ni a. PHED Minister Pu Zodintluanga chu Khuallian niin mobile app thar ‘PHE Smart Water’ tih a tlangzarh nghal a. Conference thupui hi ‘Tui: Mitin mawhphurhna’ tih a ni.

PHED Minister Pu Zodintluanga chuan thu sawiin khawvel thang zelah technology hmang tangkai apiangin hma an sawn chak a ni, a ti a. India ram chhunga hmun kilkhawr tak taka sawrkar scheme kalpui te chu technology hmangin khawpui zawk atangin an vil tawh a ni tiin technology than ruala ke pen kan ngai a ni, a ti a. PHED ruahman app ‘PHE Smart Water’ chu technology hmanga mipuite tan awlsamna thlentu a nih thu sawiin ruahmanna lawmawm tak a nih thu a sawi a. App hmang hian mipuiten tui haw hun an hre thei anga, bill zat en leh pek te, bill pek hun te, tuibill chhutna thlengin a awm a ni tiin mipuiten tangkai taka an hman a beisei thu a sawi a. Heng thil hi technology in a ken tel a ni a, hemi bakah hian mipui tana tangkai tur thalai zawkten kan zir thar zel a ngai a ni, a ti a.Tun dinhmunah hian Aizawl mipui tan Greater Water Phase I leh II atangin tui pump chhuah a ni a, mipui ten hnianghnar lehzuala tui an dawn theih nan SIPMIU hnuaiah project kalpui mek a ni bawk,  a ti a. Kan ramah ruahtui kan dawng nasa a, mahse fur lai pawhin tui supply-ah harsatna kan tawng tho a ni tiin mipuiin tui dahkhawl kan zir a, kan humhalh thiam a ngai a ni, a ti a. Ruahtui kan ngah a, Rain water harvesting te hi kan uar chhoh chuan tullo taka tui hmanna a tlem dawn a ni, tiin tui khawl thatna midang hnena hrilh darh turin kalhawmte chu a chah a ni.

Planning & Programme Implementation Secretary Dr. C. Vanlalramsanga chuan NEDP kaltlangin PHED ten rualkhai leh hnianghnar zawka mipuite tana tui an pek theihna tur ruahman a ni chu lawmawm a tih thu a sawi a. NEDP hnuaia department hrang hrang hmalakna leh hlawhtlinna te a tarlang a. ‘Smart Water Solutions Mizoram’ lehkhabu a tlangzarh nghal a ni. 

Mizoram hian tui chungchangah harsatna tam tak kan nei a, thal lai phei chuan tui supply duhthusamin kan dawng lova, mi tam zawk chuan tui kan lei chawp thin a. Kan tuihnate hi humhalhna a awm mumal loh avangin fur lai tih lovah chuan kan lui tuite a kam nasa a, tun aia awmze nei zawka tui renchem dan tur leh tuihna humhalhna kawnga hmasawn dan tur Conference-ah hian sawiho a ni.

Mobile app thar ‘PHE Smart Water’ hi mipuiten awlsam taka tui connection chungchang an hriat zung zung theihna atana ruahman niin Integrity Solutions siam a ni a. Aizawla tui connection 50,000 chuang hman tur niin district dangah pawh hman theih thuai a ni ang. Heng a hnuaia tarlan te hi app hmang hian a tih theih a ni:

1)Bill zat en leh pek

2)Bill hlui leh pek tawh en

3)Bill pek loh chungchanga hriattirna dawn

4)Tui haw hun tur hriattirna

5)Meter reading thlalak thehluhna

6)Bill complaint thehluhna

7)Phone number thlak theihna

8)Tui Bill chhutna leh a dangte

App hi Google Playstore atanga download theih a ni. PHED hian mobile app ‘PHE Mizoram’ tih PHED hnathawk te tana duan bik chu an hmang mek a, ‘Smart Water Solutions Suite’ tih chu district tinah hman niin central billing system felfai taka kalpuina tur a ni a, bill khawntute tana awlsam taka tui meter chhiarna ‘Field Tracker’ app an hmang bawk a. Hemi bakah hian mipuite tan lungawilohna thehluhna tur leh thurawn  lak theihna tur www.phedmizoram.in ah duan a ni bawk. 

PHED Commissioner & Secretary Pu KT Beicho chuan kalkhawmte lawmna thu a sawi a. Integrity Solutions CEO Pu Lebbaeus Denis chuan App sawi zauna hun a nei a. PHED E-in-C, Pu Lalmuanzova chuan sawrkarin mipuiten hnianghnar taka tui an dawn theihna atana hma a lo lak tawhna leh hmachhawpte a sawi a. Mizoram Consumer Union Secretary Pu C. Laldawngliana chuan tui supply chungchanga mipuiten harsatna an neih thin te a tarlang a.  Chawhnu lamah ‘Tui leh mipuite’ tih thupui hmangin panel discussion neih a ni a. ‘Tuihna humhalhah mipuiten mawh an phur’ tih thupui hmangin YMA (Mover) leh MJA (Opposer) ten debate an nei a. MZU Civil Engineering Department faculty atangin ‘Tui chungchang hi’ tih hmanga thusawi hona ngaihthlak a ni a. Aizawl Watsan Circle S.E. Pu Lalrothanga chuan lawmthu sawina in hun a khar a ni. He hunah hian PHED hnathawkte, AMC, YMA, MJA, SIPMIU, MZU, Green Mizoram Network leh Local Council atangin an tel a ni.