Vawiin hian Justice Pu Michael Zothankhuma, Portfolio Judge for the State of Mizoram, Gauhati High Court chuan Serchhip District a tlawh a, District Bawrhsap Dr. Lalrozama, IAS leh Pu Lalngaihmawia Zote, Chief Judicial Magistraten lo dawngsawngin, chawhma dar 11:00 khan Serchhip District Court Office-ah District chhunga sawrkar Department Officer thenkhatte nen inkawmhona an nei.

Pu Michael Zothankhuma chuan Mizoram District tin tlawh chhuaha, harsatna an neih te leh hma lak dan tur chungchang sawihona hun nei tura lo kal anih thu a sawi a, District tinah E-Court Project kalpui mek nih thu sawiin, Police Department, District Court leh Jail te chu tunlai thiamna hmanga thlunzawm veka, Video Conferencing hmanga hna thawh anih theih nan hma lak mek a nih thu a sawi. Thawktute indaihlohna chungchang sawiin thubuai ngaihtuah chungchangah duh anga chak hma lak a harsat thu a sawi a, District tina harsatna an neihte pawh a theih ang chin chinah ngaihtuah sak a tum thu a sawi. Chak zawka hma lak a nih theih nan Sawrkar Department hrang hrangte nena thawhho tha zawk an neih theih nan tanrual puiah a sawm nghal a ni.

Pu Michael Zothankhuma hian New Serchhip Khawtetlang rama District Court Officers Quarters sakna tur ram chu a hmunah kalin a en a, an ram neih hi duh anga a zau tawk loh deuh avanga Officers Quarters pawh la sak rih loh anih thu sawiin, a tul anga hma lak chhunzawm mek anih thu a sawi bawk.

Serchhip District Court ah hian Chief Judicial Magistrate hovin thawktu 11 an awm meka, Legal Services Authority, Assistant Public Prosecutor-te bakah Excise & Narcotics Department leh Police te nen an vaiin thawktu 21 an awm mek a ni.