Vawiin khan RTI Week 2016 chu I&PR Conference Hall Mamitah hman a ni a. Pi Lalbiaksangi District Bawrhsap chuan khuallian niin a hmanpui.

Pi Lalbiaksangi, District Bawrhsap chuan RTI chu Mizoram chuan kan hmelhriatna la rei lo mahse kan hmang tangkai chho mek zel a, a lawmawm takzet a ni ati. RTI chu sorkar dik leh rintlak langtlang sorkar a awm theihna tura din a ni a, India mi tupawh in sorkar hmalakna leh hnathawh kan hriatduh kan hriat theihna tura dan tha tak a ni tiin, chutih rual chuan department tihbuai duh vang leh mi mal inbeihna ang zawnga zawhna zawh erawh chu phal a ni lo a ni a ti. Langtlang sorkar kan siam theihna tura din RTI chu hmang tangkai zel turin kalkhawmte a sawm a ni.

Mamit khawpui chhunga SPIO leh SAPIO te chu zawhna kan dawnte a hun taka chhang thin turin a chah bawk a ni.

Pu Paul Rokima, DIPRO chuan keynote address pe in RTI Act chu fimkhur leh dik taka hman a tul thu sawiin dan leh hrai hi hman sual theih a nih avangin kan hman danah fimkhur a tul hle a ni a ti bawk. RTI chungchanga hriattur hrang hrang sawi zauna a nei bawk a ni.

Pu Vanlalhmachhuana, SDC Mamit pawhin RTI Act sawizauna a lem nen a nei bawk.

He hun hi Pu H. Lianzela Addl D.C chuan a kaihruaia, Pi H. Lalchhandami, SDO (Sadar) chuan lawmthu sawina neiin hun a ti tawp.

Vawiin RTI puala hun hmanna ah hian Mamit khawpui chhunga SPIO, SAPIO, Department tina Dealing Assistant, tlawmngai pawl hrang YMA, MHIP, MZP, Jt V.C, MUP, PRISM Hqrs Mamit atanga leh MJA, Mamit atang ten aiawh te leh RTI Activist te an tel a ni.