Vawiin khan Republic Day vawi 66 na chu Kolasib Tumpui field ah ropui taka lawm a ni a, zing dar 10 khan DC Pu Jitender Yadav , IAS chuan hnam puanzar pawtpharhin March Past chibai a chhang a ni.
Thu sawiin Pu Jitender Yadav chuan, India ram ropui takin mahni inrelbawla Danpui Constitution a neihna ni hi a hlu takzet a ni a ti a. Hemi ina a rah chhuah Remna hnuaia hmasawnna tamtakte chu mipuite hi a zarzotu kan ni, a ti a. Hei hi mipui mimir leh sawrkar tanhona vang a niin a lawmawm em em a ni, a ti.
Kolasib District chhung bik hmalakna thenkhat tarlangin Pu Yadav chuan, PWD chuan Bairabi leh Bilkhawthlir inkar kawngpui double lane –a siam chu 80 % an zo tawh a, khawpui chhunga kawngpui leh khaw inkar kawngte thawmthat leh mek a ni, a ti a. Taxation Department chuan 2014-15 atan December 2014 thleng khan chhiah Rs 6,25,07,089 /- a hmu a, target a khumna chu 107.17 % a ni a. January 2014 atanga siam tan, Vairengte check gate atangin December 2014 thleng khan chhiah Rs 31,26,191/- hmuh tawh a ni a, a ti bawk.
Kut hnathawktute hmasawn nan Minor Irrigation te, Agriculture, Horticulture leh Krishi Vigyan Kendra te chuan tha an thlah ngailo tih sawiin Minor Irrigation hnuaiah tui kawng , tui dah khawlna leh thlai china tura lei siam rem hna te thawh a ni a, Minor Irrigation Project 76 siam zawh tawh a ni, a ti a. Fisheries Deptt. chuan Sangha chi 77 lakhs a thlawnin RKVY scheme hnuaiah a sem a, Serlui B Hydel Project –ah sangha Pangus a khawi pawh 270 Quintal lai a thar chhuak tawh nghe nghe a ni, a ti.
SIRD pawhin Central atanga a sum dawn hmangin State chhunga Officer hrang hrangte tan training programme hlawhtling takin a buatsaih thin a, VC te hnenah an hnathawhna turin Computer a pe bawk a ni, a ti.
Kolasib-a Republic Day lawmna ah hian Contingent 17 in march past hmuhnawm tak an entir a.,TNT Pipe Band in Band Display hmuhnawm tak an entir bawk a ni. March Past lawmman dawngtute chu Unarmmed Contingent zingah 1na - JNV Thingdawl, 2na - Hmar Veng H/S leh 3na - HT HS te an ni a. Unarmed Contingent zingah 1na - Excise & Narcotics, 2na- NCC Girl leh NCC Boys St. John Higher Secondary School te an ni.
Kolasib-a Republic Day lawmna ah hian Line Department 8 ten NLUP hlawhtlin taka an kalpui dan tarlanna Tableu entir a ni a. Hei bakah hian Republic Day puala Sports inelna hrang hrang neiha lawmman latute hnenah leh March Past tithate hnenah VIP Pu Jitender Yadav hian lawmman a sem bawk a ni.
