Vawiin chawhma dar 10:00 khan Hnahthial-ah Republic Day ropui taka lawm a ni a, he hunah hian Kannan Gopinathan, IAS, SDO (C) chu khuallian niin Hnam Puanzar a pawt pharh a, school parade contingent 10 te Hnam Puanzar chibai buk a chhang let a ni.

Khuallian Kannan Gopinathan chuan thu sawiin, Kum 65 zet liam ta vawiin ni angah khan keini India mipuite chu mahni a ro inrel a, remna leh muanna leh hmasawnna mitinte hnen a a thlen theih nan zalenna pek kan ni a. Kan hruaitu hmasa te huaisen na, finna leh remhriatna te avangin hnam hnufual leh endawng ni thin chuan innghahna Constitution fel tak kan nei a. An kawng lo siam sa chu zawhin vawiin ah chuan mitin hriatah hmasawnna duhawm tak neiin ei leh bar, sum leh pai dinhmun tha kan lo chang thei ta. Amaherawhchu, heng thilte hi a thlawn a kan dawn ni lovin, vawiin a remna leh muanna kan neih leh hmasawnna kan neih te hi hun kal tawh a kan thawhrimna rah chhuah a ni a. Tunah pawh hian kan ram leh hnam in hmasawnna duhawm leh remna leh muanna a neih zel theih na tur a thawk turin ka sawm che u a. Hnahthial pawh hian thawhrimna, rinawmna leh theihna hmanga kan ramah entawn tlak tur a kan thawh hi a tul em em a, kan ram leh hnam thatna tur leh hmasawnna tur hian kan theihtawp chhuah turin kan insawm a ni.

Hmasawnna hnathawh hrang hrang sawiin NLUP kalpui dan te, Hnahthial bial hriselna dinhmun te, Cash Crop Spice Development hnuai hnathawh mek te, ICDS, PHE, SDEO, P&E, Forest Department, Agriculture, PWD leh KVK hnathawh mek leh hmasawnna te a tarlang a ni.

Nikum kumtawpa Tuipui ‘D’ a Lei dawh mek chu vanduaithlak takin a chim pawi a tih thu leh lei thar him zawk leh tha zawk, in kal pawhna tha kan neih thuai theih nan siam a nih thuai a beisei thu te, Hnahthial leh a chhehvela infiammi Mizoram mai ni lo India ram pum huap pawh a mi langsar, Jeje Lalpekhlua te, National Women Hockey Champion Team member 3 lai mai kan nei te, tun a India U-14 Team a tel thei tur naupang pakhat Hnahthial atanga kan awm thei lawmawm a tih thu leh inchhuan tlak a tih thu a sawi bawk.

Khuallian chuan tunah hian Hnahthial ah ATM Counter buatsaih turin SBI Chairman hnenah an Office in ngenna an thehluh thu leh theihtawp an chhuah tur thu chhanna an dawn thu te, Hnahthial in Broadband Internet Connection tha kan nei loh avang BSNL hotute a biak thu leh, BSNL hotute hian Broadband D-SLAM khawl hi Serchhip atangin an rawn dah phei a, hun reilote ah hman theih a nih beisei thu a sawi bawk a ni.

Attachment

  • Loading attachment...