Republic Day vawi 66-na chu ramchhung hmun dangte rualin Mizoram pumah vawiin khan hman a ni a. Mizorama a lawmna pui ber Aizawl Sipai Lammuala neihah chuan Mizoram Larsap Dr. Aziz Qureshi chuan tukin zing dar 9:00 khan hnam puanzar pawt pharhin, parade contingent 27-te chibai buk chhangletin, Republic Day thuchah a sawi a ni.

Larsap chuan he ni lawm tura pungkhawm zawng zawng leh Mizoram mipuite hnenah a duhsakna hlanin Constituion in a ken, democracy rorelna kalphung ropui tak chawinung a, humhalh leh ti chakturinmipuite a chah a. Kum kalta chhunga Sorkar hmalakna tlangpui a sawi a ni.

Larsap chuan remna leh muanna boruak hnuaiah chauh lo chuan hmasawnna a tluantling thei lo va tiin India rama state ralmuang ber ni chhunzawm zel thei tura dan leh thupek kengkawhtu chak tak kan nei hi a vanneih thlak a, sawrkar kut tichak tura NGO te, Kohhran hrang hrang te, Media leh mipui vantlangin dan leh thupek kengkawhtute tha taka an tawiawm thin hi a lawmawm a ni, a ti.

Larsap chuan New Land Use Policy (NLUP)chu theihtawp chhuaha kalpui chhunzawm mek anih thusawiin kumin piah lam thlenga kalpui chhunzawm zel turin Supplementary Plan buatsaih mek a ni, a ti a. NLUP hmalakna hnuaiah hmasawnna project pawimawh tak, “Joint Initiative on Eco-System based on Livelihood Promotion in Mizoram” chu kalpui mek a ni a. Hemi atan hian Mizoram Sawrkar leh United Nations chuan nikum, 16th October, 2014 khan thawhdunna tur, Memorandum of Undertanding (MoU) an ziak a. He project hi UNO nena Mizoram Sawrkar thawhdunna hmasa ber leh la awm chhun a niin hmalakna chhinchhiah tlak a ni, a ti bawk.

Govenor chuan lo neih leh thlai chin te hian thingtlang mi te tan eizawnna ngelnghet a siam a, heng hi sumpai hmasawnna atan a pawimawh hle a ni a tiin lo neitu te, thlai tharchhuah tihpun nan tihdan hmang tha zawk leh khawl changkang zawka thuam mek an nih thu a sawi a. Bukvannei, Kolasib District ah darkar khata MT 5 hriak her thei Oil Palm Mill hawn a ni thu te, Lunglei leh Serchhip ah Oil Palm Mill dang 2 hawn tura ruahman mek a ni thu te, NLUP hnuaiah sapthei, iskut, lakhuihthei, serthlum leh hmunphiah chingtu ten an tharchhuah atangin sumhnar mumal tak an nei thei thu te leh  Bawnghnute tharchhuah pung chho awmze nei zawka sawngbawl leh hralhchhuah a nih theih nan Indigenous Milk Product Manufacturing Plant, nitin litre 5000 sawngbawl thei chu MULCO Complex-ah reilote ah hawn theih beisei a nih thu te a sawi bawk.

Larsap chuan inkalpawhna kawngpui siam changtlun hi Sawrkar ngaihpawimawh tak a ni reng a tiin  2014 khan Mizoram chhungah National Highway thar 4 - NH 306A, NH 302, NH 6 leh NH 102(B) puan an nih thu leh  thlawhna hmanga inthlunzawmna tihchangtlun nan Helipad 10 siam tur atan Ministry of DoNER atangin sanction hmuh tawh a ni thu te a sawi a. Mizoram hian kawlphetha siamchhuah theihna lian tak a nei a, chutianga kawlphetha siamchhuah tihpun nan leh Aggregate Technical & Commercial Loss (AT&C) tih tlem nan kawng dap reng anih thusawiin Larsap chuan  Thingtlang tihen Rural Electrification hnuaiah khaw 111 kawlphetha pek an ni a, Intensive Electrification hnuaiah khaw 378 khuh niin BPL chhungkua 15,893 te chu a thlawnin electric connection pek an ni, a ti. Mitin hnena tui in tur thianghlim leh hnianghnar pek hi Sawrkar ngaihpawimawh a ni a tiin  Special Plan Assistance (SPA) te, Non Lapsable Central Pool of Resources (NLCPR) te, Ministry of Urban Development leh North Eastern Council (NEC) te atanga sum dawn hmangin water supply scheme 28 thawh mek a nih thu a sawi bawk.

Larsap chuan Mipui hriselna leh damlo inenkawlna changtlung siam hi Sawrkar chuan a dah pawimawh thusawiin hun reilo te ah Mizoram chuan ama pualin Medical College a nei dawn a ni, a ti a. Larsap chuan Sawrkarin thingtlang mite hmasawnna leh harsa zawkte chawikan thupui ah a nei tiin Mahatma Gandhi National Rural Employment Guarantee Scheme (MGNREGS) hnuaiah job card 1,94,686 pek niin chhungkua 1,52,519 te chu kum 2014-2015 chhung hian inhlawhna siamsak an ni tawh thu a sawi a. Zirna hi hmasawnna tehna pawimawh tak a ni a tiin zirna tihchangtlun chu Sawrkar in a dah pawimawh hle thusawiin  Academic Session (2015-2016) thar atang chuan Government Primary School ah KG-I leh KG-II class dah a ni tur thu a sawi bawk.

Infiamna chi hrang hrang chawikan nan Sawrkar chuan hma a la zel a, thalai leh infiam mite tan hmanraw tul leh infiamna hmunhma din turin a bawhzui reng a ni, a ti a. Thalaite mamawh phuhruk nan Champhai Zotlang leh Lunglei Serkawn ah stadium puitling an hmang mek tawh thu te, Boys’ Hockey Academy, Kolasib District ah Hockey Astro Turf phah zawh tawh thu te leh Mizoram hmun hrang hrang ah sports stadium 9 sak mek anih thu te sawi bawk. Khawpui tihchangtlun leh a chhunga cheng te mamawh ruahman sak chu Sawrkar chuan a ngaipawimawh hle a tiin Sawrkar Laipuia Ministry of Urban Development leh Ministry of Housing & Urban Poverty Alleviation kaltlanga sum za zela sawm hmarchhak state te tana dah hran (Lumpsum Grant) hmangin khawpui cheithatna Urban Infrastructure Development leh rethei te chenna chawikan Slum Area Development Project hrang hrang thawh chhoh mek a nih thu a sawi. 

Larsap chuan Sawrkarin mipui hnena eibar pek tha taka kalpui turin dik tak leh langtlang taka kalpui a tum tlat thusawiin mipui hnena eibar sem hna Targeted Public Distribution System Operations pawh Department chuan computerisation beiin tunah hian Ration Card 2,41,272 awm zingah 2,15,463 (89.30 %) chu digitised a ni tawh a ni, a ti.

Larsap chuan Mizoram Tax leh Non Tax Revenue tihpun nan Finance Department chuan theihtawpin hma a la mek a,  sawrkar kum chhung atan department zawng zawng te tlin tur target tuk sak an ni a, sumpai dinhmun chawikan nan kawng hrang hrangin hma lak mek a ni, a ti a. n 62.49 % a tling a, kum kaltaa hemi hun chhunga lakkhawm aiin 19.8 % -in a tam a ni. Khawtlang inrelbawlna tihchangtlun nan Sawrkar chuan “The Lushai Hills District (Village Council) Act 2014”, “The Mizoram Election to Village Council Rules 2014” leh “The Mizoram Animal (Control and Taxation) Act 2014” te duangin  7th Legislative Assembly of Mizoram chuan 4th Session ah a passed thusawiin He Bill-a thil pawimawh tak pakhat chu  Village Council Executive Body-a hmun thuma thena hmun khat chu hmeichhe tana hauh a ni, a ti a. Sawrkar Laipuia Lokpal leh Lokayukta Act zulzuiin, tlawmngai pawl te, mithiam leh a kaihhnawih te inrawnkhawmna neih hnuah Mizoram Legislative Assembly chuan Lokayukta Bill 2014 passed ani chu a lawmawm tiin Mizo hnam leh khawtlang nunphung milin Legislative Assembly chuan November 2014 khan The Mizo Marriage, Divorce and Inheritance of Property Bill 2014 chu a passed bawk a ni, a ti.

Bairabi leh Sairang inkara rel kawng thar siam hna tluang taka kalpui a nih theih nan Railways leh State Sawrkar inkara thawhhona tha a awm theihna turin Task Force on National Railway Project din a nih thu te, Adventure Tourism leh Eco Tourism tihchangtlun nan hma lak mek nih thu te, Ramri-a insumdawn tawnna (Indo-Myanmar Border Trade) tihchangtlun nan Champhai District Zokhawthara Land Customs Station (LCS) sak zawh tawh hawn mai theih a nih thu te leh National electronic Governance Plan (NeGP) hnuaiah Department leh pawl 33 huam turin Electronics & Mobile Service Delivery Project a ruahman mek thu te hi a thusawiin Larsap chuan a tarlang.

Larsap chuan Mizoram hmasawnna tura Sawrkar hmalakna hrang hrang an thlawp tlatna leh tawiawmna avangin tlawmngai pawl zawng zawng te, kohhran te, mipui leh thu thar thehdarhtu te chungah lawmthu sawiin remna leh muanna, hmasawnna leh inpumkhatna vawnghim zelturinmipuite a chah a ni.

Vawiin Sipai Lammuala Republic Day lawmnaah hian Chief Minister Pu Lal Thanhawla bakah Minister-te, Parliamentary Secretary-te, MLA-te, official-te, zirlaite leh mipui thahnem tak an tel a. Parade contingent titha te leh he ni puala infiamna chi hrang hranga lawmman dawngtute hnenah Larsap chuan lawmman a sem bawk a ni. Lammuala lawmna inkhawm zawhah hian Larsap chenna Raj Bhavan-ah sawmbikte tan thingpui ruai buatsaih a ni.