Vawiin chawhma dar 11:00 a.m. khan Pukpuia Chawngbawla Hall-ah Green Mizoram Day hman a ni a. Lunglei DC leh Lunglei District Green Mizoram Committee Chairman ni bawk Pu Joseph H. Lalramsanga’n kaihruaiin Lunglei High Powered Committee Vice Chairman Pu S. Laldingliana chu Khuallian a ni.

Pu S. Laldingliana chuan tunlai khawvelin a buaipui mek global warming chu a takin thing leh mau tih chereu avangin kan tawng chho zel a ti a. Tu leh fate chenna tlaka ram siam a nih theih nan kalkhawmte chu thing phun leh enkawl zui turin a sawm a, tlawmngai pawl leh sawrkar hnathawkte inpekna lawmawm a tih thu a sawi bawk.

Lunglei D.F.O leh District Green Mizoram Committee Member-Secretary ni bawk Pu H. Lianmawia’n report a pe a. Kum 1999 atanga kum 2015 thleng a Lunglei Forest Division hnuaia thingtiak sem leh phun zat chu 4,75,413 a nih thu  sawiin kuminah planting agency 66 an awm thu leh thingtiak thar 460 phun beisei a nih thu a tarlang a ni.

Programme zawhah hian Pukpuia Forest Nursery-ah Khuallian Pu S. Laldingliana, Lunglei DC Pu Joseph H. Lalramsanga leh Lunglei DFO Pu H. Lianmawia te’n Ceremonial Tree Planting an nei nghal a ni.

Green Mizoram Day-ah hian Special Award Pu Thanmawia Chawngthu, MPS (Rtd.) leh Pu P.C. Sangpuia, Haulawng te hnenah hlan a ni a.  Kangmei ven kawnga khaw titha - Lungpuitlang, Lungleng ‘S’ leh Zotuithiang te hnenah lawmman pakhatna, pahnihna leh pathumna hlan a ni a. Kangmei chungchanga thu chhuah tha chanchinbu – Daifim, Hlimthla leh Zochhiar te hnenah lawmman pakhatna, pahnihna leh pathumna hlan an ni.

Planting Agency thingphun enkawl tha te hi chi hnih a thliarin, a lian tawh enkawl tha ah SDEO ‘N’, D.A.O. leh Lunglei Govt. College NSS Unit-ten pakhatna, pahnihna leh pathumna an la a. A te enkawl tha ah Lunglei B.D.O., Soil & Water Conservation leh Art & Culture (D.R.O) ten pakhatna, pahnihna leh pathumna an la a ni.