Ramchhung hmun dangte rualin vawiin chawhnu khan National Tobacco Control Programme (NTCP) Mamit District bultumin I&PR Conference Hall-ah World No Tabacco Day hman a ni a, Addl DC Pu H. Lianzela MCS chuan khuallian niin a hmanpui; Tabacco Free School pali hnenah lawmpuina citation a hlan nghal bawk.

Khuallian Pu H. Lianzela chuan nawmsakna aiin kan himna leh nakina kan hlimna tur ngaituah hmasak a tul tawh thu sawiin, kan hriselna ngaipawimawh a, mahni in hmangaih a, vaihlo lak ata fihlim turin kalkhawmte chahin, pulpit atang pawh a vaihlo thatlohzia kan auchhuahpui a hun tawh thu a sawi bawk. Ram leh hnam hrisel kan nih loh chuan kan economy a thang thei dawn lo a ni tiin, rohlu kan tu leh fate tan hnutchhiah tur hriselna nei turin zuk leh hmuam i do ngam ang u tiin kalkhawm te a sawm a ni.

World No Tabacco Day thupui “ Vaihlo tuam dan pawimawhna leh nghawng a neihte” chungchang sawiin Pu H. Lianzela chuan pawnlam mawina in a chhung lam chhia a khuh mawi avanga kan thihpui leh si chu ngaihmawh awm tak a nih thu a tarlang bawk. Tanho chuan Tabacco free Mamit kan siam thei dawn a, kan kum chhiar pawh a tam ngei ang tiin, zirlai kalkhawmte chu kan thluak 100-a 10 atanga 20 tal hmang thei tur chuan vaihlo lak atanga fihlim a ngaih thu leh hnam changkang zawk te el pha tura zirna lamah pawh a thiam ber ni thei tura a puih thei dawn thu a sawi bawk a ni.

He Programme ah hian Mamit District Consultant NTCP Dr Nancy Lalnunmawii chuan Power Point presentation hmangin an hmalak tawhna te leh Cigarette and other Tabbaco Product Act (COTPA) dan hnuaia section hrang hrangte a hrilhfiah nghal bawk a, Mamit District-in pakhatna a hauhna- signage tar tha ber, vantlang hmuna mei zu tlem leh zial bung hmuh tur tlem (Office& public place) bakah ashtray leh vaihlo kaihnawih thil hmuh tur tlem ber district an nih thu a tarlangin Anti Tabacco Club School hrang hrangah din a nih thu a tarlang bawk.

Programme hi Chief Medical Officer Dr Hmingthanmawiin kaihhruaiin in lawmna thu a sawi a, thutiam sawihona hun a neihpui nghal bawk a Dr. PC Laliannghaka’n lawmthu sawina hun a hmang bawk.