Mizoram Florists’ Association (MFA) vawiin dar 11 khan Assembly Secretariat Annexe ah ‘Florist Christmas Fair’ an neih chu Home Minister Pu R. Lalzirliana’n a hmanpui.
Pangpar eng pawh hi an mawi in hmuh an nuam a, mi tupawh pangpar ngaisang leh ngaina tak mi chu misual tak leh rilru kheuh beuh tak hi an vang khawp mai tiin khuallian Pu R. Lalzirliana chuan pangpar ngaina a duat tak te hi chu mi rilru tluang tak an ni thin a ti a. Mizoram Florist Association in ‘Florist Christmas Fair’ an buatsaih hun leh an pangpar te chu inhmeh a tih thu sawiin Pu Lalzirliana chuan ‘Ber’ thla a lo ni in Masi Par - Poinsetia vul chuk mai mawi taka pho chhuah chuan Bethlehem lam a hawi nghal ruih mai in Lal Pian hun lawmawm kan thleng leh dawn tih a hriat a ni tiin christmas ah chuan Lal Pian hun hla sak nuam a tih thu sawiin ‘Masi ah chuan ka lam chhuak lo thei lo’ tiin kan thinlungah Lal Isua a piang reng tur a ni a ti a. Pangpar mawi tak tak ten Christmas boruak an tithianghlim a, piangpar enkawl leh zawrh ah ‘corruption’ a awm ve thiang lo in rilru an ti hlim a, lungawi lohna kan neih pawh a thawi dam thei a ni a ti bawk.
Hring nun kan chan chhungin Hlim ni, lawm ni, tah leh lungngaih ni a awm thin, mahse kum khua in ruah a sur reng lova, chhum a zing reng lo a ni tih hriaa harsatna leh beidawnna tawh lai pawh a beidawng lo tura chah in Home Minister chuan khawvel ah hian thil theih loh tak tak a awm lo, dikna leh rinawmna, taimakna leh thahnemngaihna te nena kan thawh chuan hlawhtlin ni a her chhuak ngei ang a ti a, opposition MLA a nih lai pawha pangpar lakhawm a, Bazar a an zawh thin thu leh chu chuan lawmna nasa taka a thlen thin thu sawiin ram nuam kan neih zel theih nana tang sauh sauh turin MFA member te chu a chah a ni.
Flower Show leh Fair etc. te buatsaih nana hmun an neih loh chungchangah Pu Lalzirliana chuan awm a tihpui thu sawiin pangpar chauh lo pawh thil dang Handloom, Books etc. zawrhna tur hmun thar sorkarin a zawn mek thu leh helam atana hma a lak mek thu a sawi bawk.
Florist Christmas Fair hawnna inkhawm kaihruaitu Pi Lalnuntluangi, President, MFA chuan kum 1997 November atanga an pawl lo indin tan dan sawiin pangpar chingtute hamthatna ngaihtuah leh pangpar chin leh hralh chungchanga rinawmna leh dikna vawn tlat te hi an thil tum a nih thu a sawi.
Mizoram Florists’ Association ah hian branch 11 awm in member hi sang chuang lai awm in vawi 35 fair an nei tawh a, kum 2009 atanga 2014 October thla thleng a an pangpar hralhna belhkhawm hi Rs. nuai 105 chuang lai a ni tawh a ni. He Florist Fair hian 9th - 12th December, 2014 thleng a awh ang a. Fair ah hian dawr 42 awm in pangpar chi hrang hrang lei tur a awm a ni.
