PWD changtu Chief Minister puitu Pu Lal Thanzara Minister of State hovin vawiin khan Chief Minister’s Office Conference Hall ah PWD hotu lian te an thukhawm a, PWD hna thawh mek te an thlirho.

MOS Pu Lal Thanzara chuan PWD hmalakna te thlirhova Review Meeting neih thin chu lawmawm tiin an hnathawhna ah hmasawnna a thlen ngei a beisei thu a tarlang a, meeting-a an sawihona te ngaipawimawha chak taka bawhzui thin turin PWD hotu rualte chu a chah. Ram hmasawnna ruhrel khawihtu department an nih avangin PWD ah chuan mipui beiseina pawh a sang a ni tiin Minister chuan thawihtawpa tan la turin a fuih a, a huna hna thawh zawh hman loh chuan nasa takin hmasawnna a tihthuanawp thin thu sawiin a hun taka thawh zawh a nih theih nan thahnemngai taka ram tan thawk thin turin a chah bawk. PWD hnuaia hnapui - kawngpui siam leh in sak te chu ram tana rotling a nih theih nan leh quality tha taka thawh a nih theih nan PWD officer ten uluk lehzuala vil thin turin a fuih bawk. National Highway leh State Highway siam hna thawktu ram pawnlam mi Contractor te pawh uluk taka vila enpui thin turin a chah bawk. Hlemhletna umbo turin Sorkar chuan khauh takin a kalpui zel dawn a ni tiin Minister chuan PWD officer te chu rinawm taka thawk thin turin a fuih bawk a ni.

PWD Principal Secretary Pu Lalram Thanga, IFS pawhin Review Meeting chu department thlen chin leh hmasawnna tur inbihchian nan a tangkai thu a sawi a, an hnuaia hnathawh te chu hrechiang vek turin PWD hotu rualte chu a fuih bawk. Sorkar Laipui hotu ten hmasawnna chak tur chuan project delay a awm tur a ni lo ti-a an sawi thin chu a pawimawh thu sawiin Project khawtlai avanga Mizoram-in sum kan hmuh tur ang kan hmuh loh phah thin thu te tarlangin uluk zawk leh thahnemngai taka thawk thin turin a chah bawk. Inkalpawhna leh kawlphetha chu Sorkar ngaihpawimawh ber a nih thu sawiin Principal Secretary chuan an hmalakna te pawh uar zawka a hmuna vil thin turin a ngen a, hna tha zawka thawh a nih theih nan Contractor te pawh training neihpui a tangkai a rin thu te a tarlang bawk. PWD hmalakna te chu mipui khawih a nih avangin leh mipui lamin an hna thawh dan hmang leh harsatna te an hriatpui chian tawk loh thin avangin mipui hriat tura chiangkuang taka hrilhfiah thin a pawimawh thu te a sawi lang bawk.

Vawiin PWD Review Meeting ah hian PWD Engineer in Chief Pu R.Vanlaltluanga hovin Superintending Engineer chin chunglam an tel a, PWD hnuaia hmalakna chi hrang hrang te an thlir ho a ni.