Vawiin khan Mizoram Youth Commission Chairman Pu T.Sangkunga hovin Labour, Employment & Industrial Training (LE&IT) Principal Secretary Pu Lallawmsanga IPS, LE&IT Addl. Secretary Pu Rotluanga, LE&IT Joint Secretary Pu Lalrammawia, LE&IT Director Pu Lalhmachhuanna bakah MYC leh LE&IT Deparment hotu dangte chuan Aizawl Press Club ah chanchinthar thehdarhtute an kawm a. Mizo thalai hna zawng mek te tana kawng hrang hranga hma an lak dan an tarlang a ni.

Mizoram Youth Commission leh LE&IT Department tang kawp hian kumin June ni 4 leh ni 5 chhung khan Aizawlah Skill Fest hmasa ber buatsaihin thalai hna zawng lai mi sing chuangin he Fest hi an chhim a. Chung zinga 2855 te chuan Vocational Training Providers (VTP) hrang hrang ah training turin an inziaklut a, thalai 1055 te chuan Mizoram pawnah training an nei mek a, an zinga training zo tawh mi 88 chuan hna an hmu tawh a ni.

LE&IT Department hnuaiah hian VTP 43 inziaklut tawhin heng zinga 29 chu state pawn lam a mi te an ni a. VTP te register an nih dawn hian department lamin a endiktu tur Inspection team a tir a, Skill Fest 2014 behchhana in register duhte phei chu uluk lehzuala endik vek an ni. Skill Development Initiative Scheme in inkaihruaina a siam dan chuan batch then chungchangah batch khatah mi 10 aia tlemlo, mi 33 aia tam lo an awm tur a ni a. VTP thenkhat trainees 100 chuang neite pawh hian trade hrang hrang - Beauty & Skin, Soft Skill, Hospitality, Retail, Aviation leh a dangte ah training an pek avangin SDIS inkaihruaina dan mil tur hian anmahni lamin batch an lo siam rem mai thin a ni.

VTP thenkhat a kal ten sorkar hriatpui lova kal anga inngai an lo awm nia hriat a ni a. Hemi chungchangah hian Pu T.Sangkunga chuan LE&IT Minister hovin a pisaah uluk taka ngaihtuah leh sawiho a nih thu leh sorkar hriatpui VTP a zirte reng reng chu sorkar kaltlanga lak an ni lo a nih pawhin sorkar tirh leh buaipui turah pawm nise tia an rel thu a sawi a. Certificate chungchang ah assessing body ten certificate hmu tlaka thiam a an ngaihte chu National Council for Vocational Training (NCVT) in khawvel ram hrang hrangin an pawm mek Trade Certificate pek an nih tur thu leh hemi baka certificate dang duh belh tan chuan examination fee chawia exam pek leh phawt a tul thu a tarlang bawk.

Ei leh in leh riahna tur chungchangah O2 Academy, Hyderabad a zirlaite atangin harsatna an tawh thu dawn a ni a. A chhan ni a lang chu ei leh in inthlak vang leh sik leh sa lo danglam tak vang niin a lang a. Hemi chungchangah hian Department Officer te a hmun ngeiah kalin zirlaite harsatna tawh hi an enfiah a. Tun dinhmunah chuan complaint pawh dawn a awm tak loh thu press conference ah hian tarlan a ni.

State dang thalaite ang bawkin Mizo thalaite hi State chhunga sorkar hna in a daih tawh lova. Chuvangin state danga phur taka hna an zawn theih nan leh hna hmu tura training tura phur taka an kal theih nan a hnual zawnga sawipui lova, phurpui theuh tur leh a felhlel awm apiangte siamtha tura thurawn pe thin turin Mizoram Youth Commission Chairman chuan mi tinte a sawm a ni.