Tukin zing khan Parliamentary Secretary for Art & Culture Pu H. Zothangliana chuan Lawngtlai Chandmary venga Multi Purpose Hall sak mek a tlawh.

A mah lo dawngsawng tu Chandmary Branch YLA leh khawtlang hruaitute hmaah Pu H. Zothangliana chuan Hall sak lai chu tha taka puitlin a nih ngei a beisei thu a sawi a, theih tawp kan chhuah zel anga hmantlak tak leh zahpui awm lo tak ah kan chhuah ngei ang a ti. A sak tawh chin chin ah an thawk tha tawk a a hriat thu leh a neitu Branch YLA te inpekna a ngaihsan awm hle a a hriat thu a sawi bawk.

He Hall, a dunglam feet 90 leh a vang lam feet 57 hi chhawng thuma sang niin BADP Fund Rs 10 lakhs an hmuh hmanga kum 2010 a bul tan an ni a, a hnuah a chhunzawm na turin BRGF ah Rs. 65 lakhs thun a ni leh a, heta tang hian tun thlengin Rs. 30 lakhs chuang hret hmuh a ni tawh bawk, chumi hnuah BADP atang bawkin Rs. 30 lakhs an hmu leh a, tun thleng hian Rs 76 lakhs he Hall sak nan hian an dawng tawh a ni. Hetih lai hian a chung leh a bang thenkhat te bakah a chhunglam chhunzawmna tur sum eng emawzat mamawh a la ni.

Tukin a Parliamentary Secretary in Hall sak lai a tlawh naah hian Chandmary Branch YLA President Pu C. Lalhimnakulhpuia kaihhruaiin inkhawm tawi neih a ni a, hetah hian Building Treasurer Pu Alex Lalzawmpuia’n Hall an sak dan report a pe a ni.

Parliamentary Secretary hi Pu M. Misael, MCS, Lawngtlai BDO in a tawiawm a, Branch YLA te buatsaih tukthuan tuihnai tak an kil ho nghal a ni.